Zunthlum Nat Nei Hrangah Exercise Tuah A Ṭha

Zunthlum (Diabetes) hi tuilai nat ti sehla a sual tam lo ding. Kum note khal in zunthlum nei an tam zet. A ti dam theih lo hman ah kilkhawiawk theih a si.

Zunthlum nei pawl in thisen thlum (Blood sugar) level a ti niam theih dan ṭha bik pakhat cu eksersai, cangvaihnak (Exercise) tuah a si. India thuthangca hminthang pakhat Times of India health section in zunthlum nei pawl hrangih exercise lak dan ding a tarlang mi pawl kan tarlang ve hnik ding.

Zunthlum nei pawl hrangah exercise hi tawngpaw lak hnakin kan tasa ṭul mi le tangkai ding mi exercise tuah thiam a thupi zet. Midang hrangih ṭha hi kan hrangah a ṭha thluh cuang lo. Curuangah kan taksa hrangih ṭha le hlawknak um mi, vei le khat ih kan blood sugar ti niam theitu ding kan hawl thiam a ṭul.

1. Cak zet ih feh (Brisk walking)

Cakzet ih feh a ṭha, a tlan ih tlan khal a ṭha thotho. Asinan tlan hnakin cakzet ih feh a ṭha deuh. Taksak hlumter, thlan ti suak a ṭha. A mal bik zarh khat ah vei thum, zing tin minute 30 tal brisk walking tuah ṭheu ding.

2. Lam (Dancing)

Exercise lak hi na paih lo zet asile taksa sawizawinak dang na hawl a ṭul. Lam in taksa a sawizawi ih blood sugar a ti niam thei. Cui tlun ah lam hi a nuam ih taksa a zangkhaiter.

3. Ti Leuh

Ti leuh hi zunthlum hrangah exercise ṭha bik pakhat a si. Taksa rit hlonnak hrang khalah a ṭha. Zarh khat ah vei thum tal ti leuh thei sehla a ṭha.

BBC ih tarlang mi ahcun zunthlum nei mipum let 4 hrawng an karh ih 400 Million in an nei zo. Leitlun huap harhdamnak hnaṭuan pawl cun zunthlum hi thihnak thlentu a pasarihnak a si tiah an sim.

Zunthlum nat phun 1nak pawl cu punghman in sii dawt cun a zia um thei, phun 2nak cu taksa cangvaihnak le ei in supawknak in a luar ding a kham thei. Cu vekin kan tuah asile natnak ngah ding 350 Million kan kilhim thawn a bangaw tiah an sim.