Yangon Khawsung Tamwe Ah Bomb A Puak

Yangon Khawsung Tamwe Ah Bomb A Puak

Yangon ramthen Tamwe peng (တာမွေမြို့နယ်), Aung Mingala lamzin, July 12 ah sun ah bomb ring zet a puak tiah theih a si.

Bomb puak mi hi mipi kilhimtu Yangon Liberation Force (YLF) le Urban Revolutionary Front (URF) tangtlang in ralhrang pawl puah ngah dingih an kam mi a si nan tualsung mi pawl in an hmu ih an zoh ciamco ruangah mipi siatsuah lo dingin an mission an thulh sal thu Yangon Liberation Force (YLF) in an tarlang.

“Ralhrang motor pawl bomb puah ding kan kam, zing nazi 11 luan hrawngah hnawm sar nauhak pawl an ra thleng ih bomb an hmuh ruangah an au. Mipi in an zoh ciamco ruangah tualsung mi pawl thi le hriamtuar lo ding in mission kan thulh sal. Ralhrang pawl an thlen hnuah bomb an ti puak” tiah mipi kilhimtu YLF ih tarlang mi ihsin theih a si.

Sun nazi 12 hrawngah ralhrang bomb thianfaitu pawl an thleng ih Aung Mingala lamzin kawi le ဗညားဒလ lamzin mipi feh sukso an kham thluh ih ralhrang pawl in bomb an ti puak tiah vengsung mi pawl in an sim thu BBC in a tarlang.

Mission pakhat kan tuah mi ah sumpai tampi le kan ralkap nunnak thap in kan tuah mi a si ruangah mission pakhat kan thulh tikah cemliam mi le sunnak tampi a um. Mipi in bomb kam mi nan hmuh tikah thu duh tuk le a burpi ih zoh ciamco lo ding, dothlengnak sungah zate tel cio dingin sawmngennak khal an tarlang tel.

Tui bomb an kam mi hi a cangkaing tuk thu, ralhrang pawl umnak thawn hmun hla deuh ih um ding in mipi kilhimtu sungtel pakhat in mipi a forh thu DVB hnenah a sim.

BBC cun July 12 simlam nazi 3 hawng, Myay Ni Gone (မြေနီကုန်း) Dragon Center kiang khalah bomb a puak ih hriamtuar an um thei thu, ralhrang pawl in lamzin an kham ih cekfelnak an uluk thu a tarlang.

July 11 simlam ah မရမ်းကုန်း peng, ၉ မိုင် Ocean kiang, အင်းစိန်၊ မြောက်ဥက္ကလာပ၊ တောင်ဥက္ကလာပ၊ မြောက်ဒဂုံ၊ တောင်ဒဂုံ le အရှေ့ဒဂုံ peng pawl khalah bomb puak a um thu Irrawaddy ih tarlang mi ihsin theih a si