Yangon Khawsung Kilhimnak Hngetkhoh Zet Lakah Bomb Puak A Tam

Yangon Khawsung Kilhimnak Hngetkhoh Zet Lakah Bomb Puak A Tam

Ralhrang in kilhimnak an uluk zet nan Yangon ah bomb puak a um rero. Ni 1 sungah Thingangyun peng, South Dagon, North Dagon peng ah bomb a puak ih thi le hriamtuar an um tiah theih a si.

Yangon ramthen ဒဂုံမြို့သစ် (47) veng, July 31 zinglam ih bomb puak ruangah nunau 1 hriam a tuar tiah North Dagon tualsung mi pakhat in a sim.

Zinglam nazi 11 luan ah (47) vengih le ဗိုလ်မြတ်ထွန်း lamzin le ဗညားဒလ ih um မုန့်ဟင်းခါး dawr ah bomb a puak. Dawr neitu a ke ah hriam a tuar thu tualsung mi pakhat in RFA hnenah a sim.

“Hriamtuar cu sizung ah an phur, cabuai hnuai in a puak. Ziang pawlkom ih puah mi a si ti theih a si lo” tiah a sim.

July 31 zing Thingangyun peng ih သုဝဏ္ဏ (29) vengsung inn pakhat ah bomb a puak, innsung ih um mi 2 an thi tiah theih a si.

Zinglam nazi 9 hrawngah South Dagon peng, veng (17) ahmat 2 lamzinpi နတ်စင်ကားမှတ်တိုင် ah bomb a puak ih mipa 3 le nunau 1 hriam an tuar tiah kiangkap um pawl in an sim thu BBC in a tarlang.

Hi ni ah ralhrang pawl in Yangon khawsung kilhimnak an uluk ih lamzinpi lawng si lo in vengsung ah ralhrang motor le motor te in an vak rero tiah tualsung mi pawl in an sim.

July 30 khalah Yangon City Hall (မြို.တော်ခန်းမ) dunglam ih gate kiang, zinglam nazi 11 ah bomb a puak ih palik 4 le sipin hnatuan mi 2 hriam an tuar tiah Myanmar Now in a tarlang.

Thirsur ih an kham mi မြို.တော်ခန်းမ dunglam a kiang hrawng ih feh pawl lakah mi 2 in kut den bomb in palik pawl an deng. Palik တပ်ကြပ် 1, ဒုတပ်ကြပ် 1 le palik 2, sipin mipa 1 le nunau 1 in hriam an tuar tiah theih a si.