Ungti In Hi Ṭawl Duh Pawl Hrang Ah A Ṭha

Ṭawl Duh Hrangah Ungti (Coconut) In A Ṭha

Ungti (Coconut) hring hi taksa harhdamnak hrangah ṭhatnak tampi a nei ti cu mi zokhal ih theih thluh mi a si. Asinan ṭawl duh hrangih a ṭhat thu hi kan thei kherkher lo men thei. Ungti hi energy drink ṭha zet a si, exercise lak thluh le lek ṭheh bang zet lai ih in tam a ṭha. Calorie a pai mal, pum sungih a bal mi kholhfaitu (Natural enzyme) le mineral phunphun a kengtel. Cu mi lakah potassium, fiber le taksa ṭhangter, cakter (Protein) khal an tel. Cu mi cu ṭawl duh pawl hrangah a ṭha hleice. A can dik zetih kan in thei cun a hnaṭuan a let in a tam tiah Times of India Health Section in a tarlang.

Ungti mineral le vitamin hi kan taksa ah a dangdang in a um asile kan taksa ih electric dat luangtertu (Electrolyte) pawl a tuaithar ih mi a tiharhvang. Umtlan le ni hman a ti nuam. Nitin vei khat tal ungti in thei ringring a ṭha.

Ṭawl duh hrangah theiti dang hnakin ungti in tam ding. Theiti dang hnakin ungti ah mineral phunphun a tam sawn. Mithiam pawl in hliakhlainak dangdang an tuah zo ih theiti dangdang ahcun sugar a phum thup aw tiah an sim. Ungti ahcun calorie a pai mal lawng si lo, theiti dang hnakin sugar khal a mal.

Ungti hi zing, sun le zan khalah a in theih, asinan zing pumpi lawng lai ih in hi a ṭha bik tiah an sim. Lauric acid a keng tel ih cu mi in natnak do thei dingin taksa a cakter, metabolism a cakter ih cu mi cu ṭawl duh pawl hrangah a ṭangkai zet mi a si. Ṭhinnat/thinthip (Heartburn) nei hrangih a ṭhat hlei ah naupai luaksuak deuh, ti hngialhngial ih um ṭheu pawl hrang khalah zinglam ih ungti in a ṭha. (The Aizawl Post; Nove 11, 2019)