UN Security Council In Ralhrang Cangvaihnak A Mawhthluknak Hmuh Dan Dangdang

UN Security Council In Ralhrang Cangvaihnak A Mawhthluknak China Le Russia In Lungkimpi

Russia le China telin UN Security Council, ram 15 in democracy duh ruangih cangvaitu pawl parah ralhrang in thi dingin thu a then sak mi cu lungrual ten an namthla ih an mawhthluk a si.

Myanmar ralhrang pawl thuneihnak a pehpeh in milai covo an pahbal mi thawn pehpar in UN Security Council ah Russia le China in vito thuneihnak hmang in an rak humhim theu. Ramkhel mi 4 thi dingih thu an thensak mi an awk that ruangah Myanmar ralhrang pawl ih thil tuah mi parah UN Security Council in na sa zetin a namthla ih a mawhthluk. Ralhrang pawl in Daw Aung San Suu Kyi le U Win Myint telin ramkhel ruangih thawngtla zaten suah cih dingin UN Security Council cun dil ngennak July 27 ah an tarlang.

Russia le China in mipi duhphorhnak dokalhtu ralhrang pawl humhim a ol nawn lo tiah China ram ih hrambun Myanmar ramkhel hliakhlaitu pakhat Dr. လှကျော်ဇော in a sim.

“China le Russia in a hlan ah ralhrang pawl an rak humhim. Min Aung Hlaing san khalah cu vek thotho a si. Asinan tuihnui ih an thilti dan pawl cu a rapthlak tuk, mipi pawl thinlung a hngetkhoh tuk zo ruangah mipi mithmai khal zoh thiam a tul. Curuangah Russia le China in mal teten dung an tun vivo khal a si thei. Mipi in ralhrang thuneihnak a hramphong ding in ziangtik hmanah dung kan sip lo ding timi lungput kan langter mi ih rah suah a si” tiah RFA hnenah a sim.

Thahrumhmannak a zaten ban san ding, milai covo le dingthluk lairelnak daanhrampi pawl cu famkim zetih thlun dingin UN Security Council in ralhrang pawl hnenah dilngennak an tarlang tel.

Thi dingih thu an then sak mi pawl cu that lo in thaten ruat aw sal dingin ASEAN in theihternak a nei zo nan a tuvekin an cangvaih ruangah a hminsin ding thu ASEAN an tarlang.

Myanmar ramsung buainak relkhawm ih cingfel ding le democracy lamzin zawh sal thei dingin tha kan pe nan ralhrang pawl ih lehrulnak cu ziangtik hman ah lungawinak ding a um lo. China telin leilung tlun ram dangdang an riahsia tiah hliakhlaitu pawl in an sim.

July 26 ih ralhrang pawl in thuthang simfiangnak an tuahnak ah ramsung ramleng ihsin dokalhnak a um thei ti thei cingin an awk that thu ralhrang thusim theinak tuanvo neitu Zaw Min Tun in a sim.

Ralhrang sinak sang tiang rak tuan pawl thawn din mi သေနင်္ဂမဟာဗျူဟာလေ့လာရေးအင်စတီကျု အမှုဆောင်ညွှန်ကြားရေးမှူး ဦးသိန်းထွန်းဦး cun UN Security Council ih ca suah mi cu ramkhel harsat peknak men a si tiah a sim.

“Thu dik kan sim asile ram dang pakhat in a dang ram pakhat thutluknak tuah mi va mawhthluk men a ngah lo. Asinan milai covo, milai zawhruah bomnak pawl ahcun lungkim lonak, a remcang lo tivek namthlak le mawhthluh a ngah ko. Asinan thi dingih thuthen sak mi ruangah Myanmar ram ziangtin hremnak an pe ding, bummawknak men ih hremawk a ngah lo. An ca suah mi fiangten kan sim asile ramkhel harsatnak pekawknak men a si. Vei tampi kan ton mi le kan thei mi a si ih a danglam ciamconak a um lo” tin a sim thu RFA in a tarlang.

Leilung tlun ih ram thangso le ram tum an timi G7-Canada, France, Germany, Italy, Japan, UK le American ramleng vuanzi pawl khalin ralhrang pawl ih cangvaih dan an namthlak thu le ramkhel ruangih thawng an thlak mi pawl suah zalen dingin July 28 ah an tarlang.

“Ralhrang in thuneihnak an lak mi cu a sangbik mi tongkam in kan namthla a si. Myanmar ram ah ramkhel, pursumleilawnnak, zatlang nun, milai zawnruahnak, milai covo dinhmun cu tihphan um zet a si” tiah an ca suah mi ah an telh thu BBC in a tarlang.

China le Russia telin UN Security Council ram pawl in ralhrang pawl rapthlak zetih an cangvaihnak an cohlang lo thu an langter mi parah kan lungawi zet. Myanmar ram decmocracy lamzin a zawh sal theinak ding ah UN Security Council in tu hnakin na sa in in bom kan tul tiah NLD Central sungtel ဦးကျော်ထွေး in a sim.

“Ralhrang pawl in rapthlak zetih an cangvaihnak cu Myanmar mipi lawng si lo in leilung tlun in an cohlang thei lo ti a lang. UN Security Council telin leitlun ram dangdang in democracy le milai covo manmual ngaithupi mi miphun dangdang in ralhrang pawl cu a ranglam ih siat suah thei dingin lamzin phunkim thawn a takin in bom lawngah Myanmar mipi in hmuitin mi democracy zamrang ten kan thleng thei ding” tiah RFA hnenah a sim.

Ralhrang in thuneihnak an lak hnu a hmaisa bik thurelkhawmnak an tuah mi ah ralhrang in thuneihnak an lak namthla dingin UN Security Council in a zuam nan China in a dokhal. Myanmar ram thawn pehpar in UN Security Council cun vei tampi thurelkhawmnak a tuah nan Myanmar ram ralhrang pawl hremnak pek ding thu ah China le Russia in an rak kham ringring. Asinan democracy lamzin hrangih cangvaitu an awk that thu thawn pehpar in China le Russia in ralhrang cangvaih dan an cohlang ve lo ruangah hmailam ah Myanmar ramsung buainak cu thil danglam a thleng vivo thei tiah ramkhel hliakhlaitu pawl in an sim tiah RFA in a tarlang.