Tio Ih Kahawknak Ah Ralhrang Mi 5 An Thi Ih Mipi Kilhimtu Hnenah Ralhrang Mi 4 An Pe Aw

Tio Ih Kahawknak Ah Ralhrang Mi 5 An Thi Ih Mipi Kilhimtu Hnenah Ralhrang Mi 4 An Pe Aw

Falam peng Rihkhawdar ahmat (2) veng, Tio ah August 10 zinglam nazi 2 ihsin nazi 7 tiang ralhrang le mipi kilhimtu na sa zetin an kapaw ih ralhrang lam mi 5 an thi, mi 4 cu mipi kilhimtu hnenah an pe aw tiah CDF CDM-Siyin in a tarlang.

Rih ih ralhrang pawl khalin ralthuam tum in an bawm ih ralthuam tum vei tam zet an kap ruangah khawsung khalah a tla, inn an ngah mi khal a um. Ralthuam tum puak kuai mi ruangah raltlan 1 a thi ih mi 2 in hriam an tuar tiah tualsung mi pakhat hnen ihsin theih a si.

“Ralthuam tum an run kah ruangah Tio ih um pawl kan tlan. Ralthuam tum ih peh mi ruangah Hmunlai ihsin raltlan mipa kum 45 luan hrawng a thi. A nau pa khal a kut ah hriam a tuar, cun mi dang pakhat khal a hmai ah hriam a tuar. Kahawknak a reh hnuah Jet Fighter a zam rero” tiah tualsung mi pakhat in a sim.

Tio tlangpar ih ralhrang sakhan cu CDF CDM-Siyin, PDF Zoland, CNDF le MEDF tangtlang in an kap. Kahawknak ah ralhrang lam hriamtuar an tam thu le ralhrang mi 4 cu ralthuam tel lo in mipi kilhimtu pawl hnenah an pekaw. CDM-Siyin pakhat in hriam a tuar tiah CDF CDM-Siyin in a tarlang.

Mipi kilhimtu pawl in ralhrang sakhan cu vei tam zet drone in bomb an thlak ih an umnak inn pawl khal a siat. Zinglam nazi 9 hrawngah ralhrang raldonak vanzam (Jet Fighter) cu vei tam zet a zam tiah tualsung mi pawl in an sim.

August 2 khalah a pehpeh in zan 3, drone in bomb an thlak. Zan hnihkhat an cawl ih mipi kilhimtu pawl in drone hmang in bomb an vun thlak sal theu. August 6 zan khalah na sa zetin meithal a puak tiah theih a si.

Tio tlangpar ih ralhrang pawl sakhan hi March 25, 2022 Myanmar le India ramri lilawn ih Myanmar thantar cu CNO/CNDF in an lak thlak hnuah Chin Thantar an tar. March 26 ah ralhrang pawl in operation tuah in Myanmar thantar an tar sal hnuah sakhan an tuah mi a si. Mipi kilhimtu pawl in an va kap theu tiah theih a si.

photo: ralhrang sakhan drone in bomb an thlak ngah mi