Thingkung Parah Internet Le Phone Line Hman Tul

Thingkung Parah Internet Le Phone Line Hman Tul

Magway ramthen Gangaw peng le Sagaing ramthen, Kalay thlanglam hmun hrekkhat ah internet an phit sak ruangah thingkung par kai in internet an hmang thu theih a si.

“Thingkung par kai ahcun line a ngah theu. Thuhla theithei dingin tualsung mipi pawl cu thingkung par an kai ih internet an hmang. Kalay thlanglam lawng si lo in Kalay saklam khalah cu vek thotho a si” tiah a hmunih um hliakhlaitu hmin tarlang rem lo pakhat in a sim.

Khawpi sungah internet an pe nan ralhrang in operation an tuah tinten internet le phone line an phit sak theu tiah theih a si.

Ralhrang pawl in internet le phone line an phit sak ruangah tualsung mi pawl pehtlaihawknak le thuthang theihnak lam ah harsatnak an nei. Tlaikhaw hnu lawngah ralhrang an ra ti an thei ih harsatnak tampi an tuar. Tualsung mipi kilhimtu pawl khalin internet le phone line an on sak lo asile tower pawl siatsuah sak dingin theihternak vei tampi an rak pe zo.

Magway ramthen, Pauk peng (ပေါက်မြို့နယ်) thlanglam khalah May 28 ihsin line an phit sak zo ih thla 1 sungah an on sak lo asile tower siatsuah sak ih ralthuam tuahnak khalah an hman sak ding thu ralrin peknak an rak nei zo tiah theih a si.