Tamu Peng Ah Ralhrang Pawl In CDM Harhdamnak Lam Hnatuan Le Rualbanlo An That

Tamu Peng Ah Ralhrang Pawl In CDM Harhdamnak Lam Hnatuan Le Rualbanlo An That

Tamu peng Tamu le Kalay lamzin ih um Khamaih khua le Nanmonta khua, Setpember 8 ah ralhrang mi 200 hrawng an lut ih CDM harhdamnak lam hnatuan le zeng itnak ih um ringring rualbanlo pakhat cu san um lo in an kapthat tiah tualsung mi pawl in an sim.

Ralhrang pawl in Tamu peng Khamaih (ခမိတ်) khua ih CDM harhdamnak siivai lam hnatuan Ko Ta Nge (Kum 29) le Nanmonta khua ih um a taksa zeng, U Thaung Kho Ran (Kum 48) cu san um lo in an that.

“Ko Taa Nge hi a rualpa thawn bike in zing ah lo an feh. Ralhrang pawl thawn an tong aw thutthi ruangah a kir sal. An dunglam in ralhrang pawl in an kap, a dung ih to a si ruangah an kap ngah ih a hmuh ah a thi cih” tiah tualsung mi pawl in an sim.

Nanmonta (နန်မွန်းတား) khua ih U Thaung Kho Ran hi a itnak ih um a si. A feh thei lo a zengnak kum 2 a rei zo. Ralhrang pawl in an inn an bauh ih an luhhnawh hnuah an that tiah a sim bet.

Ralhrang pawl in Khamaih khua ih pafa an kai ih ralphaw ah an hmang. Khawsung ah inn an bauh vivo ih thil an fir hlei ah inn an ur kang tiah theih a si.

Khamaih le Nanmonta khua hi Tamu ihsin peng 10 hrawng hla a si. Ralhrang pawl hi khawsung in an suak zo ih Patha (ပန်းသာ) khua ah an lut sal. Inn an bauh vivo tiah tualsung mi pawl in an sim.

Tamu peng ah tuikum June ihsin September thla tiang ah ralhrang pawl in mi 50 hnakih tam an that zo tiah theih a si.

Photo: Ralhrang pawl in Khamaih (ခမိတ်) khua inn an suasam mi