Tamu Ah Raltlan Thil Zuar An That

Tamu Ah Raltlan Thil Zuar An That

Tamu peng ih raltlan pumcawmnak hrangih hmakphek zuar cu a tlun lam ah thah a si ih ni 2 hnuah a ruak hmuh a si tiah tualsung mi pawl in an sim.

“Hmakphek a khar ih Tamu ah a va zuar theu. Tlun lam ah lamzinpi a zawh ngam lo ih zin dang in a tlung. A lu ah hriam a tuar ih a ruak an hmu sal” tiah tualsung mi pakhat in a sim.

Phuysawhti pawl tamnak ပန်းသား khaw mi ကိုညီညီ (Kum 33) hi အင်ဒိုင်း khua ah raltlan in a um ih nupi, fapa 2 le fanu 1 nei a si. July 31 simlam nazi 5 hrawngah an pehtlaih ih နန်မွန် khua ihsin အင်းဒိုင်း khaw fehnak ကွင်းလမ်း timi lamzin a thlen thu a sim. Inn thlen ti a neih lo ruangah an pehtlaih sal ih mipa aw dang an thei ih phone call a ngah nawn lo tiah theih a si.

Neta bik an pehtlaih theinak hmun hrawng cu Phuysawhti um tamnak a si ruangah duh vekin an hawl ngam lo. Nikhat hnuah an hawl bet ih ရွှေပွင့်ဖြူ hmuan ah a ruak an hlawn mi an hmu. Meithal kahnak a um lo nan a lu ah vuaknak hriamhma an hmu thu tualsung mi pawl in an sim.

August 1 ah Tamu myo-mah (12) veng ah kuva dawr ih kuva lei mipa (Kum 50 hrawng) khal Phuysawhti pawl in meithal in an kap that. ကိုမောင်မြင့် hi လက်သမား hnatuan in pumcawm a si. Ramkhel thu thawn zianghman pehtlaihnak a nei lo tiah Central Intelligence Agency Tamu Director in a sim thu Mizzima in a tarlang.