Siibawi Le Lungawilonak Nat

Siibawi Le Lungawilonak Nat

Lairawn Meifar

Veikhat cu mina pakhat hi siibawi hnenah “Siibawi pa, lungawilonak nat ka tuar. Zangfah ten in tuamhlawm dam hram aw,” tin a ti. Cutikah siibawi pa cun mina ih natnak cu a hawl, a ṭheh tikah mina hnenah “Na thinlung diriamnak tha a mal tuk. Lungawinak ding thil pakhat na ton tikah na ngahmi hnakin na ngah hrih lomi lawnglawng na ruat ih tam deuh ngah bet ding na duh ringring. Na ngahmi parih lungawi ding hnakin na ngah hrih lomi parah ruahsannak na nei ringring. A si ko lo maw?” a ti.

Mina pa in, “A dik tuk, siibawi pa. Curuangah ka lungawilonak nat hi in ti dam a ṭul rori si ko,” a ti ih siibawi pa cun, “Siibawi: Ok. Ka lo ti dam thei ding,” tin a kam ih mina pa cu khan pakhat sungah a hruailut, “Wow…zu thaw phunphun, beer le a hmeh ding sa thawthaw a va tam ve,” a ti ih siibawi pa in, “Na duh zatin na in, na ei thei. Asinan minute 30 lawng caan na ngah aw. Na in, na ei thei tawk na ṭhua thei. Minute 30 a kim cun na cawl ding,” a ti. Cutikah mina in, “Minute 30 lawng maw, duh ai in caan a mal deuh si,” a ti.

Cutin mina pa cun a duh tawk in beer le hmeh thawthaw, a phunphun a ṭhua na sa. Nazi a zoh thul, beer a in thul, a hmeh thawthaw a ei. Minute 30 a kim ih siibawi pa a rat tikah mina pa cu a kut ah beer palang le ar cawn kio car a keng lai. Caan bikhiah a kim zo ruangah siibawi pa in beer le ar cawn kio car kha ei nawn lo dingin thu a pek. Mina pa cun lungkim lo cing in siibawi thu cu a thlun.

Siibawi: Duh tawk ih na in/ei ih na diriam maw?

Mina: Ai…diriam lo lawlaw. Caan a mal tuk.

Cutikah siibawi pa cu hni phah ten mina hnenah, “Na natnak hi na hmufiang zo maw? Na in mi le ei mi parih diriam ding hnakin na in le ei hrih lomi lawnglawng na thinlung na ret. Na thinlung ah pamhmainak lawnglawng a khat. A ngaingai ti ahcun beer khuat khat le ar cawn pakhat lawng lo pe hnik sehla na diriam zet ding. Thaw zet in na in, na ei ding. Atu cu nang cun in le ei ding tampi a ummi lawnglawng na zoh ih duhhamnak in na khat a si kha,” tin a ti.

Mina pa cu ziang khal ṭong ding thei cuca lo in siibawi pa cu a zoh keukeu ih siibawi pa in hitin a simsal: “Na in dan le na ei dan hrimhrim hi a palh tuk. Alak (free) ih in le ei theihmi tirawl pawl hi na pum sungah tlem le tlem lo tiangin ei na duh. Thazang hrang ding khal na ruat lo. Thaw zet ih ei ding khal na ruat cuang lo. Hivek hi man nei zetmi thil kha man nei lo zet ih cangter thawn a bang aw. Kei si sehla…in le ei ding tirawl hi ziang tlukin tam khal sehla ka ei thei zatte lawng ka ei ding. Ka eimi tirawl ih thawtnak khal ka thei ding.”

Na thei dah maw, thei dah lo cu ka thei lo. Paisa in tirawl a lei thei, asinan kaa thawtnak (Rawl ei thawtnak) cu a lei thei lo. Ziang tluk tirawl thaw zet si khal sehla a thawtnak kan tep ngah lo ahcun sullam a nei lo.

Siibawi pa in neta bik a sim mi cu: “Khale…atu cun na natnak a fiang zo. Lungawilonak nat na tuar hi ziang dang ruangah a si lo. Diriamnak na tlaksam ruangah a si. Minute 30 caan lasal in na kut sungih beer le a hmeh kha nuamte ten vun ṭhua hnik awla…a thawtnak na tep/thei mai ding,” tin a ti.

Zirh Duhmi:

(1) Lungawi thei lem lo ih kan um ṭheu khi kan ngahmi parah thinlung ret mumal lo in kan ngah hrih lomi parih thinlung kan rak ret tam sawn ṭheu ruangah a si.

(2) Duhhamnak thawn a khatmi thinlung sungah lungawinak in hmunram a nei dah lo ding.

(3) Ngah hrih lomi hnakin ngah zomi parah na thinlung ret awla lungawinak in na khat dingih, cuih na lungawinak cun na ngah hrih lomi thil pawl na hnenih thleng dingin lamzin a lo sialsak mai ding.

// Hram: Lawkanite Thuta Sarpay