SAC Ralhrang Thuneihnak Thla 6 An Than Bet, Henry Van Thio A Tel

SAC Ralhrang Thuneihnak Thla 6 An Than Bet, Kalon Thurelkhawmnak Ah Henry Van Thio Tel

National Defense and Security Council (NDSC) July 31, 2023 ih thurel khawmnak ah SAC ralhrang cun an thuneihnak thla 6 an than bet tiah theih a si.

Hi thurelkhawmnak ah Acting President U Myint Swe le Vice President Pu Henry Van Thio khal an tel. Ralhrang in thuneihnak an lak (Emergency period) ih National Defense and Security Council (NDSC) thurel khawmnak ah Vice President Pu Henry Van Thio hi a vei 1 telnak a si.

Rampi poipeng hruak (Emergency period) ah ralkap hotu in thuneihnak tuanvo a la sung thei. Kum 1 ah vei 2, thla 6 ah vei 1 tin thuneihnak tuanvo a neih mi an than bet thei nan hrilawknak a tuah sal ding timi Myanmar danhrampi sungah a um. Asinan SAC ralhrang hotu Min Aung Hlaing cun ralkap bawi pawl in 2008 Myanmar danhrampi an tuah mi a pahbal ih a thuneihnak a than bet.

Lailang ten kan sim asile rampi poipeng hruak (Emergency period) timi cu can bikiah a um. Kum 1 sungah thuneihnak tuanvo neitu in a hnatuan a theh suak man lo a si ahcun a thuneihnak cu thla 6 hi vei 2 a than bet thei ih hrilawknak tuah ding a si. Ralhrang pawl in danhrampi an thlun lo, an duhduh in an pahbal. An thuneihnak vei 3 an than zo, a tu a vei 4nk an than bet. Hi danhrampi hi ziangti zawng khalin a hmantlak nawn lo ti an langter tiah NUG Ministry of Justice Thein Oo in a sim thu Myanmar Now in tarlang.

Ralhrang Min Aung Hlaing in February 1, 2021 ih thuneihnak a lak hnuah a thuneihnak vei 4 a than bet tiah theih a si.