SAC Ralhrang Pawl Ih Hman Mi Raldonak Vanzam Le Ralthuam Zo Ram Pawl In An Bawm

SAC Ralhrang Pawl Ih Hman Mi Raldonak Vanzam Le Ralthuam Zo Ram Pawl In An Bawm

Myanmar SAC ralhrang pawl ih ralthuam hman mi, raldonak vanzam, helicopter le ralthuam dang pawl cu Russia, China le India ram pawl ih kuat mi a si. Vanzam le helicopter ih hman mi bomb phunphun, cerek pawl cu ramsung hmun 25 ah an tuah.

Ralthuam tuahnak cetzung (Weapons Factory) No. 21 ih tuanvo neitu ralhrang in thuneihnak an lak thla 3 hnu (May 2021) ih ralhrang suahsan, Captain pakhat hmin tarlang lo (Captain Zero) cun ralthuam tuahnak hrangah North Korea le China technology thiamnak in bomb an tuah thu a sim.

“North Korea thawn ralthuam tuah mi cu TPG tin an ko. Hi project a cemnak a reipi zo, tlawng kan zir theh ah North Korea pawl an um nawn lo nan an tuah rero thotho. 2016 ah China thawn tuan tlang in bomb tampi kan tuah. Cluster (ကလပ်စတာ) bomb, Carbon fiber communication interceptor bomb, HEat- High explosive, Fuel air explosive (FAE) bomb khal kan tuah. FAE bomb ih a hnatuan dan cu thaw thawt a harter ih lung lam hnatuan a cawlter thei. Cun mei alh bomb khal kan tuah” tiah a sim.

Cerek le bomb tuahnak hi Ayeyarwaddy tiva kiangah a si. Naypyitaw ih ralhrang ralthuam tuahnak cetzung ah ram dang mithiam pawl khal an um tiah kum 6 sung ralthuam tuahnak ih hnatuan zo Captain Win Naing Soe in a sim.

“1 le 4 hi nunau an tam, cu tawk ah China le North Korea lawng si lo in ram dang mi khal an um. In zirhtu hi kawlram mi thawn an nei aw ih inn le motor an pe, amah hi Germany mi a si tin an sim ka thei”

Captain Ziro cun “Cluster (ကလပ်စတာ) bomb hi leilungtlun in an kham mi a si ruangah SAC ralhrang in a ti danglam ih an tuah sal. Cluster bomb sungah bomb fa tete an ret mi cu China technology thiamnak ih tuah mi ret lo in KAPS (3) (ကပစ -၃ ) tuah mi bomb in an thleng ih a hmin ah cluster an bun. A sungih bomb fate an ret mi pawl hi a bangawk lo ruangah ralthuam lam ih leilungtlun dan le dun a pahbal lo”

China thawn tuan tlang in Myanmar in an tuah mi cluster bomb ngaingai cu 10 lawng a si. Cui bomb cu hmang lo in zoh mawi dingih tuah mi a si. An tuah sal mi bomb ih a tul mi thil dangdang cu China lawng si lo in ram dang tuah mi khal a tel tiah a sim.

“Cuvek bomb tuahnak dingih tul mi parts lei ding khal a um. Bomb tuahnak dingih a tul mi thil dangdang pawl cu India le Russia ta an lei. Myanmar ihsin direct lei lo in China agent hnen ihsin Switzerland le Germany ta khal an lei”

Vanzam ih hman mi ralthuam lam ih mithiam Sergeant Naung Ro (နောင်ရိုး) cun “Ka suahsan tiangah cun India in raldonak vanzam mawn dan (Pilot) an zirh deuh bik, nunau lieutenant colonel khal a tel. China in timtuahawknak lam, vanzam ih bomb bun dan pawl an zirh. Russia tuah mi raldonak vanzam an hmang tam bik ih raldonak ihsin an ra tlun tikah a siat a um maw ti an cek cih, Helicopter MI 35 ti pawl hi Russia tuah mi lawnglawng an si” tiah a sim thu RFA in a tarlang.