Ramkhel Buainak Cinfel Tumnak A Thlamte Khal A Um Lo Tin KNU Chairman In Sim

Ramkhel Buainak Cinfel Tumnak A Thlamte Khal A Um Lo Tin KNU Chairman In Sim

Ralhrang pawl ih lungput le an thil tuah dan pawl cu dothlengnak tuahtu pawl thawn thureltlannak nei ih ramkhel buainak cinfel tumnak a thlamte khal pakhat hman hmuh ding a um lo tiah Karen National Union (KNU) Chairman General Saw Mu Tu Sai Po in a sim.

August 12 ih kum 72 kimnak Karen National Martyr Day ah KNU Chairman in a sim mi a si.

KNU in ramkhel thu thawn pehpar in a dinnak le a thuken ahcun ramkhel buainak cu ramkhel thuhla vekin relkhawm ih cinfel ding a si. Dan lo in rampi thuneihnak latu ralhrang pawl ih thuken le cangvaihnak pawl, hriamhreikai in an doletnak cu dingthluk lairelnak thawn thurelkhwmnak tuah ih ramkhel buainak cinfel tumnak a thlamte pakhat khal kan hmu lo.
A tufang ah KNU dinhmun in ralthuam thawn doletnak lawng a si lai ih ramkhel buainak, ram palai le zatlangnun kilkip in a cinfel dan hawl ding a si tiah General Saw Mu Tu Sai Po in a sim.

SAC ralhrang in thuneihnak an lak ihsin tutiang ah ramkhel buainak cingfel ding, ramsung remdaihnak tuah ding le federal democracy rampi a din suah theinak ding lungput zianghman a um lo ti an langter tiah a sim.

Ralhrang hotu Min Aung Hlaing in 2022 cu remdaihnak kum a si tin remdaihnak hrangah sangka kaupin a ong ih zum tlak mi lamzin zawh ding le rampi thatnak hrang thurelkhawmnak neih a tha bik tin August 1 ah a sim tiah RFA in a tarlang.

Ramhrin miphun hriamhreikai pawl cu thureltlannak nei dingin a ko nan NUG kut tang ih PDF le tualsung hriamhreikai pawl cu thurelkhawmnak nei ding in a ko lo.

A tufang ah Karen, Kayah, Kachin, Chin ramkulh, Sagaing ramthen le Magway ramthen ah kahawknak nitin ten a um. Sagaing ramthen sung ih peng hrekkhat cu ralthuam famkim thawn operation an tuah rero tiah tualsung mi pawl in an sim.

KNU hmunram khalah July thla 1 sung lawng ah KNU ralkap pawl le ralhrang kahawknak vei 259 a um tiah August 9 ih an ca suah mi ah an tarlang.

July thla sungih kahawknak ah ralhrang le BGF lam mi 386 an thi ih mi 280 in hriam an tuar. KNLA le KNDO lam mi 12 an thi ih tualsung mi 26 hriam an tuar tiah an ca suah mi ihsin theih a si.