Raltlan Lakah Naupai Le Naute Pawhfawp Lai Mi 20,000 Hnakih Tam In Harsatnak An Tong

Raltlan Lakah Naupai Le Naute Pawhfawp Lai Mi 20,000 Hnakih Tam In Harsatnak An Tong

Myanmar ramsung buainak ruangah Magway ramthen, Sagaing, Kaya, Chin ramkulh ah raltlan naupai le naute pawhfawh lai mi 20,000 hnakih tam in harsatnak an tong ih bom an tul tiah Magway ramthen sungih naupai le naute pawhfawp lai bawmtu pakhat in RFA hnenah a sim.

Nunau mi 20,000 hnakih tam cu kahawknak hmun Magway ramthen, Gangaw, Htilin, Saw, Pauk (ပေါက်), Myaing, Yezakyo, Seikphyu (ဆိပ်ဖြူ), Salin le Sidoktaya (စေတုတ္တရာ) peng an si.

Naute pawhfawp lai mi 1000 hnakih tam telin raltlan nunau mi 5000 hrawng bomnak an pe nan an daihaw lo tiah NUG ih nunau le nunau/mipa tluktlangnak (Women and Gender Equality-အမျိုးသမီးနဲ့ ကျား/မ တန်းတူရေးရာဌာန) zung hotu Dorothy (ဒေါ်သန္တာ) in a sim.

“Ei le in phurhnak lamzin ah harsatnak tampi kan nei. Cun, internet lam khalah pehtlaihawknak a harsa. Hi mi hi sawmngiarnak tum zet a si. A hlan ahcun remcang dandan in, ei in kan rak kuat thei, tu ahcun lamzin a harsa tuk zo ih Cash Transfer in vuanci zung ih nunau lam pehtlaihnak tuanvo neitu pawl hnen ihsin kan pe. Paisa kuatnak lam khal an thunun thluh thotho ih kan hrangah cun sawmngiarnak tumpi thotho a si. Lamzin dang kan hawl rero lai” tiah a sim.

An harsatnak kan theih lawng ah kahawknak tualsung ih naupai pawl felfai ten cazin kan tuah thei ih bomnak kan pe. Naupai le pawhfawh naute pawl cu sumpai, ei in, hruh ding thuamhnaw, nau neih pek ih hman ding siivai bomnak kan pe tiah a sim bet.

Nikum July thla hrawngah Magway ramthen ပေါက် peng ဝန်ခြုံး khua ih um kum 33 hrawng mi, Ma Thin Thin Khaing (မသင်းသင်းခိုင်) cun thla 6 hrawng mi naute a pai ih sahimnak hawl in hramlak hmun 5 hrawngah a thawn, tu ahcun Saw peng ih phungki tlawng pakhat ah a langten a um tiah theih a si.

Nauhak pitling hrih lo mi 2 thawn phungki tlawngah thla 7 luan hrawng a naupai mi cu ziangtin nau a nei ding ti a ruat thiam lo thu Ma Thin Thin Khaing in a sim.

“Harsatnak tam zet a si, rel khal ka paih lo, riahsiatnak a si. Naupai lai ka si ruangah harsatnak tampi ka tong. Ka fale an nauhak tuk lai fawn ih ka thin a har zet. Ziangvek in nau ka nei ding ti ka ruat ngam lo. Ziangtin hmai kan nor ding, ziangtin kan pahtlang ding ti harsatnak tampi ka nei ih ka tap theu”

Ma Thin Thin Khaing hi nau a pai lai ah kum 1 le hrek le kum 5 hrawng mi, fa 2 a nei. Nunau pakhat hrangah harhdamnak kilkhawi that ih hmunhimnak ah nau neih tul zet a si. Asinan nu pakhat hrangah thazang um ding in ei in le siivai pakhat hman a ei lo. Nauhak 2 thawn rilrawng le tihal in phungki tlawng ah an beu nan hramlak ih an tanta mi a pa, a nau le hrangah thinhar in a um thu RFA hnenah a sim.

Magway ramthen ih ပေါက် peng ih kum 36 hrawng Manan Yu Yu Hlaing (မနန်းယုယုလှိုင်) cu naupai cing in a tlan ih hramlak ah nau a nei tiah theih a si.

“Nau ka pai ih ka pum a tum zet, nau ka painak thla 8 hrawngah hramlak tlang ah kan kai ih lamzin ah nau ka nei, harsatnak cu tam a zet. Kan mahten kan um ih thi sehla kan mah ten kan thi men ding. Hmun dang feh ding khalin lamzin an khar, khat lam khat lam in kan tih ih zianghman a remcang lo. Thi ding kan si ahcun kan thi ding, kan thih ni a kim lo ahcun kan thi cuang lo ding. Hi mi lamzin pahnih hril ding mi ah pakhat cu ka hril mi a si” tiah Manan Yu Yu Hlaing in a sim.

Manan Yu Yu Hlaing in fa 3 a nei ih a fanu upa bik cu kum 14 hrawng, nauta bik mipa khal kum 10 a si. Hramlak ih nau a neih mi cu tu ah thla 6 hrawng a si. An khua. ပေါက် peng ah ralhrang le phuysawthi an lut ih innsang 260 hnakih tam, mipum 1000 luan beunak hawl in an tlan, thuamhnaw khal an hruah lai mi lawng an la man tiah theih a si.

Kum upa, zeng nat nei pawl, thinlung lam harsatnak nei mi pawl kan paw ih hramlak ah kan tlan. Lamzin ah thih cu lo ih thi tampi an um, a remcang dandan in an phum tiah Manan Yu Yu Hlaing in a sim.

Raltlan pawl lakah an dinhmun a harsa tuk ruangah rampi remdaihnak thleng lohli ih mai inn hlumte um an cak zet thu RFA in an pehtlaihnak naupai pawl le naute pawhte fawh lai nunau pawl in an sim.