Ralhrang Thuneitu Le Miphun U Lungput A Hram In Kan Phong Ding Tin KNU In Sim

Ralhrang Thuneitu Le Miphun U Lungput A Hram In Kan Phong Ding Tin KNU In Sim

Miphun u lungput le ralhrang thuneihnak cu a hram phong ko in kan siatsuah ding tiah Karen National Defense Organization (KNDO) kum 75nak, July 16 ah Karen National Union (KNU) in capi a kuat mi ah an tarlang.

Karen National Defense Organization (KNDO) hi July 16, 1947 ah an rak din mi a si.

Ralhrang thuneihnak burpi le miphun u lungput cun Karen miphun lawng si lo in mi mal sawn ruahsannak le mipi in an duh zet mi federal democracy an dokalh tiah an tarlang bet.

“An thuken an tarlang a si ko. Tualsung hmunkip ah harsatnak na sa zet a thleng. Mipi pawl in ralhrang pawl an hmu duh lo ruangah an hrial. Mi zovek khal harsatnak an pe ih an thawi, tong ngah lo a tha bik. A tu ah ralhrang pawl cu an sual deuhdeuh. Mipi menmen ei hawl pawl khal an kai” tiah KNU battalion 3 hmunram Nyaunglebin (ညောင်လေးပင်) pengpi, မုန်းမြို့ tualsung mi pakhat in KNU ih capi thawn pehpar in RFA hnenah a sim.

မုန်း peng sungah tui thla thok ihsin kahawknak a na sa tuk ruangah tualsung mi pawl sahimnak hawl in an tlan ih ei in harsatnak an tong. A tu ah ကျောက်ကြီး peng le မုန်း peng sungah raltlan thawngsawmnga hrawng an um ih hramlak le Taungoo (တောင်ငူ), Yangon khal an tlan tiah tualsung mi pakhat cun a sim.

July 14 khalah ralhrang pawl in ralthum an kah ruangah ကျောက်ကြီး peng စပ်လဲ khua ah a tla, mi 1 a thi ih nauhak mi 2 hriam an tuar tiah KNU in July 15 ih a tarlang mi ihsin theih a si.