Ralhrang Thuneihnak Thla 18 Sungah Yangon Ah Suamhmang An Tam

Ralhrang Thuneihnak Thla 18 Sungah Yangon Ah Suamhmang An Tam

Ralhrang in thuneihnak a lak thla 18 sungah Yangon khawpi ah suamhmang an tam ruangah simlam ih leng suahvah khal thin a nuam lo tiah Yangon khawsung ih um tualsung mi pawl in an sim.

Building pakhat le pakhat hi pi 2 hrawng ih hla aw a si ih khat lam khat lam in an van kai vivo thei. Sangkate kan khar dah lo mi a um ih tuihlan ah thil a hlo dah lo. Cu mi ihsin an rak vanlut ih paisa ting 2 le hrek hrawng an la. Cu mi hlan ah bike pakhat khal an rak la zo. Khawsung, vengsung le lamzin ah suamhmang le rukru an tam ruangah mah le mah ziang tin kan kilhimaw ding ti ruat ringring a tul tiah bike an ruk sak mi ကိုစိုင်း in RFA hnenah a sim.

A tufang North Dagon ah zan nazi 6 hnu cun ralrin a tul, zan 8 hnu cu mi vak um lo vek a si. Sanchaung nunau pakhat cun lamzin ah suamhmang kan tih ding maw, ralhrang le palik kan tih ding ti khal kan ruat thei nawn lo. A him lo timi thinlung ah a um ih tihnak in kan khat. Hnatuan ding a remcang lo ih paisa a har fawn, curuangah a umum tuan a si. Nikhat tuan nikhat ei hnatuan pawl khal cet zung pawl an phit ih hnatuan an nei lo. Hnatuan si lo, paisa a um lo cun kiangkap ah ziang mi ka fir ding, zo pawl ka suam ding ti ruahnak khal tampi a suak ko ding tiah a sim.

Mipi pawl cu tulnak um lo in leng an suak lo vekin a tulnak ruangih leng suak pawl khal thin nuam lo zetin an suak. Taxi mawng pawl khal in harsatnak an tong ih an nunnak khal a him lo tiah RFA in a tarlang.

August thla sungah Yangon khawsung ih Taxi mawng pakhat cu ထောက်ကြန့် lam ih mi a thlahnak ah suamhmang pawl in an kai. August 7 ah nan ra tlen suak lo asile amah kan that dingih a taxi kan ur kang ding tin an hringhro ruangah ting 20 in an va la suak tiah motor lei le a zuar tuahtu pakhat in a facebook ah a tarlang.

A hlan ah hi tivek ih suamhmang tong pawl cu veng lal pawl hnenah thuhla a sim theih vekin a nai bik mi palik sakhan ah thuhla nan thlen thei tiah ralhrang thusim theinak tuanvo neitu Zaw Min Tun in a rak sim dah zo.

Yangon ih tualsung mi pakhat cun buainak ton can ah mah rori palik sakhan feh a theih nawn lo. Vengsung upa pakhat khat hnenah sim ta a tul ih pehtlaih sawng vivo a si ruangah buainak a um khalah zohman palik hnenah thu an thlen nawn lo. Venglal pakhat khat an pehtlaih hnu lawng ah an zum tiah a sim.

Kiangkap a him lo ruangah leng suak van tik khalah suithi le sui zungbun tiang in phelh thluh a tul tiah nunau pawl in an sim thu RFA in a tarlang.