Ralhrang Pawl In Sekan Lungcet Hnatuannak Ih Inn Le JCB 2 An Ur

Ralhrang Pawl In Sekan Lungcet Hnatuannak Ih Inn Le JCB 2 An Ur Myohlah Ih Tualsung Mi An Kaih Mi Pawl Cu Bomb Kenter In Ral Hmaitongtu Ah An Hmang

Kalaymyo Myohlah le Sekan karlak, August 12 zing 7:30 hrawng in an kapaw sal, ralhrang pawl in Sekan khua, Tihang va lungcet rialnak ih inn an ur kang tiah theih a si.

Kahawknak a reh lawk hnuah Myohlah ih um ralhrang pawl cun sun nazi 1 luan hrawngah Sekan ihsin Sadaw lam fehnak, Tihang va lungcet rialnak ih inn pakhat, JCB 2 le 125 bike an ur kang tiah tualsung mi pawl in an sim.

Ralhrang pawl in Myohlah ih rawngbawltu pakhat an kai ih a mit an tuam hnuah bomb an kenter, ral hmatongtu ah a hmang. Midang an kaih mi khal ral hmaitongtu ah an hmang, tuni simlam ah an zaten an suah thluh sal tiah theih a si.

Mizan nazi 11 luan tiangah ralhrang pawl ih ralthuam tum kah mi a col lo, tuizing khalah ralthuam tum an kap rero.

Myohlah le Sekan karlak kahawknak ah mipi kilhimtu tangrual lam ihsin thi le hriamtuar zohman an um lo tiah CNDF TZ ih tarlang mi ihsin theih a si.

Ranger Kalay Defense Force (RKDF) cun August 10 in kahawknak a thok ih ral hmainortu ding ah ralhrang pawl in Physothi an hmang. An dunglam ihsin ralthuam tum in an bawm ih khua le veng suangah an ralthuam tum kah mi a tla. Ralhrang pawl ih ralthuam tum kah mi cu Sitha khua ah a tla ih inn siat suah mi a um, tualsung mi pakhat a nunnak a liam, hriamtuar khal an um tiah an tarlang.