Ralhrang Pawl In Sekan Ih IPCM Biakinn An Kap Siat, Ralhrang 1 An Kap That

Ralhrang Pawl In Sekan Ih IPCM Biakinn An Kap Siat, Ralhrang 1 An Kap That

Kalaymyo Myohlah le Sekan karlak, tuizing (August 11) kahawknak cu simlam nazi 6 tiangah a dai hrih lo, tuizing ih ralhrang pawl in ralthuam tum an kap mi Sekan vengthlang IPCM (Independent Presbyterian Church Myanmar) biakinn ah a tla tiah theih a si.

Sekan khawsung ih ralthuam tum kah mi ruangah thi le hriamtuar theih ding a um lo. Kahawknak hmun ih thi le hriamtuar khal felfai ten theihfiang a si hrih lo.

Ralhrang le mipi kilhimtu tangtlang kahawknak ah ralhrang pakhat an kap that ih a meithal le thil dang khal an laksak tiah theih a si.

Kahawknak hi zing 7 in an thok ih colh can a um nan simlam tiangah meithal puak le ralthuam tum puak on theih ding a um rero. Ralhrang pawl in Myohlah le Sekan karlak ih lungcet ah motor 2 an ur kang.

Kalaymyo khawsung ihsin ralhrang pawl in ralthuam tum in vei ziangmawzat an vun kap. Myohlah veng sungih tualsung mi an kaihkhawm mi pawl khal an suah hrih lo. Kiangkap khua le veng khawsung mi tamzet sahimnak hawl in khua an suahsan tiah theih a si.