Ralhrang Pawl In Kalaymyo Thlanglam Layinsu Khua Ah Inn An Ur Ih Tualsung Mi 2 An That

Ralhrang Pawl In Kalaymyo Thlanglam Layinsu Khua Ah Inn An Ur Ih Tualsung Mi 2 An That

Kalaymyo thlanglam လေးအိမ်စု khua (Myohlah kiang) ah ralhrang mi 50 hrawng cu August 16 zing nazi 7 hrawng in an lut ih inn an ur kang, tualsung mi 2 an that tiah theih a si.

Ralhrang pawl khawsung an lut ih meithal khal an kap puak. လေးအိမ်စု khua ah inn 2 an ur kang ih tualsung mi lo hnatuan ဦးဖိုးနီ le ဦးအောင်ဌေးဝင်း an that tiah tualsung mi pawl in an sim.

Zing nazi 6 hrawngah ralhrang pawl cu operation nei in PDF (Kalay) UG sakhan an sim. Mipi kilhimtu pawl an rak tlan thluh man ih ralhrang pawl in sakhan an ur kang, mahte tuahcop mi meithal 1, phone le thilri dangdang an lak sak. UG sakhan kiangih lo hnatuan mi 2 an that hnuah လေးအိမ်စု khua ah an lut sal tiah PDF (Kalay) battalion 2 in a tarlang.

Ralhrang pawl hi mipi kilhimtu pawl in dolet ve an tum nan လေးအိမ်စု ihsin လက်ပံခုံ khua lam ah Kalaymyo khawsung ah an kir sal thu khal an tarlang tel.

Khawsung ah ralhrang pawl an lut ruangah inn 200 hrawng, mipum 800 hrawng umnak လေးအိမ်စု khawsung mi pawl in khua an suah san tiah theih a si.

Ralhrang pawl in Kalay peng sungah inn 3,000 luan hrawng an ur kang zo ih sualmawhnak nei lo tualsung mi 200 hrawng an that zo tiah lamzawh hotu pawl in an sim.