Ralhrang Pawl In Helicopter In Myinmu Peng Le Sagaing Peng An Kap

Ralhrang Pawl In Helicopter In Myinmu Peng Le Sagaing Peng An Kap

Sagaing ramthen Myinmu peng (မြင်းမူမြို့နယ်) le Sagaing peng cu July 27 ah ralhrang pawl in helicopter 5 in an kap ih Mumandalay khua ah bu an khuar tiah theih a si.

Helicopter 3 in ralhrang pawl a run ret, khawsung le PDF sakhan a um an zumnak pawl an kap tiah Mumandalay (မူးမန္တလေး) khawsung mi pakhat in RFA hnenah a sim.

“Ruahlopi in helicopter in khawsung an kap ih a tlan man lo tampi an um. Thi le hriamtuar an tum ti kan thei nan thuhla felfai ten kan thei lo. Helicopter 5 in an run kap ih khawsung a him lo” tiah a sim.

Ralhrang pawl in Mumandalay khawsung mi 60 hrawng an kai, ralhrang pawl bukhuarnak phungki tlawng ah an hruai tiah a sim bet.

Helicopter 1 in khawsung a kap ih pakhat in ralthuam tuahnak sakhan pakhat ကျောက်ဖျာကြီး PDF sakhan a kap siat tiah PDF sungtel pakhat in a sim.

Ralhrang 50 cu helicopter in an feh, 100 hnakih tam ralhrang pawl cu Sagaing peng ihsin motor in an feh tiah theih a si.

Myinmu peng (မြင်းမူမြို့နယ်), မူးမန္တလေး, အင်းမ၊ မကျည်းကိုးပင် le Sagaing peng ih ညောင်ပင်ရှည် khua le တလိုင်းကျွန်း khua ih tualsung mi 500 hrawng beunak hawl in an tlan tiah an sim.

Sagaing peng le Myengmu peng ih operation tuahtu ralhrang pawl hi Monywa peng ih hrambun nitlaknak saklam ralhrang hmunpi ih um le Sagaing peng ih hrambun တပ်မ 33 pawl an si tiah mipi kilhimtu pawl in an sim.

July 28 zinglam ah ralhrang pawl တလိုင်းကျွန်း khua an lut ih inn 50 hnakih tam an ur kang. July 29 ah ralhrang pawl အင်းမ khua an thleng tiah theih a si.

“Khawsung an lut ih an suah zawng ah inn an ur. Mani zing ah ralthuam tum in khawsung an kap, zing ah an suak sal ih an tlan ve ten tualsung mi pawl in inn kang an va mit” tiah တလိုင်း khaw mi pakhat in a sim.

Ralhrang pawl cu တလိုင်းကျွန်း khua ihsin an suak hnuah ဆားတောင် khaw kiangah mipi kilhimtu pawl in bomb an rak puah thu mipi kilhimtu sungtel pakhat in RFA hnenah a sim.