Phone Ihsin Paisa Kuat Le Suah Pawl Zuk Dingin Central Bank In Theiternak Nei

Phone Ihsin Paisa Kuat Le Suah Pawl Zuk Dingin Central Bank In Theiternak Nei

Mi tampi ih hman mi Kpay le Wave Money agent pawl cu an dawr ah CCTV bun ding le paisa suah pawl a thupten rak zuk dingin ralhrang central bank in August 15 ah theihternak a nei tiah theih a si.

Agent pawl in paisa kuattu le a suahtu pawl cu an hmin, Myanmar ID, ID a dung le a hmai copy tuah ding, phone number, umnak address, paisa kuat le suahnak san kimcang ten lak ding thu khal a tarlang.

Hi tivek ih an tuah ruangah a pehpar lo mi khal an kai thei tiah hmin tarlang lo mi pakhat in RFA hnenah a sim.

“Mai paisa suah le mai paisa kuat timi ziangruangah an zuknak ding san? PDF bawmtu pawl an kaih duh ruangah a si ko. Dawr pawl in hi tivek in mi an zuk ahcun a pehpar lo mi an kai ngah thei. Mi cek dan ding khal a si lo, mipi le mipi karlak ah buainak suak seh ti an tuah duh ruangah a si” tiah a sim.

Agent le Kpay, Wave Money hmang pawl in level 3 account an hmang duh asile a dik mi address, khaw lal/ veng lal theihpinak, sualmawhnak buainak lakih felfai thu palik theihpitnak lak a tul. Account thar ong duh pawl hrang khalah hmin, ID (hmatpungtin), ID a dung le a hmai zuk, phone number, zuk pawl famkim ten tuah a tul tiah Central Bank cun a tarlang.