Paletwa Peng Ah Ralhrang Pawl In Long Fehnak An Kham Thluh Ruangah Thil Man A Kai

Paletwa Peng Ah Ralhrang Pawl In Long Fehnak An Kham Thluh Ruangah Thil Man A Kai

Chin ramkulh Paletwa peng ah ralhrang le AA an kahawk ihsin ralhrang pawl in ကျောက်တော် le Paletwa long fehnak August 1 ihsin an kham ruangah thil man a let in a kai tiah Paletwa khawsung mi pakhat in a sim.

ကျောက်တော်-Paletwa ah long feh an kham ruangah zarh 1 ah vei 1 lawng thilri kuatawknak cet long an feh. Ralhrang neih mi long khal a suak lo ruangah datsi le zi-nan hman ding a um lo. A dang thilri khal a let 3 zik hrawng tiang a kai tiah theih a si.

“Paletwa ihsin ကျောက်တော် peng lawng ah a hleice in thilri an la. Lamzin an kham thluh ruangah harsatnak tampi a thleng. Cet hman mi datsi le zi-nan zianghman hman ding a um nawn lo. Ei in khal a let 2 ihsin a let 3 zik tiang tiang a kai” tiah tualsung mi pakhat in a sim.

Paletwa peng ah August thla thok ihsin ralhrang le AA an kapaw ih ralhrang (289) battalion khalin hmunkip ah ralthuam tum an kap, ralthang thazang an tamter rero tiah khawsung mi pakhat ih sim mi ihsin theih a si.

“ကျောက်တော် le Paletwa ah long fehnak an kham ruangah Paletwa tualsung mi hrangah harhdamnak, ei in le zatlang nun tiang in a harsa. Paletwa cu cozah hnatuan pawl um tamnak khawpi pakhat a si ruangah sumpai lak luh mi hnakin thil man na sa zet in a khung” tiah Paletwa sualsung mi pakhat in a sim.

Paletwa peng August 2 ah ralhrang pawl in long an kah ruangah tlawngta mi 2 an thi ih tlawngta dang mi 3 in hriam an tuar. A tufang Paletwa peng sungah ralhrang le AA boruak a sosang ih kapaw thei ringring an si.