NUG In Poipeng In Meeting A Ko, Dothlengnak Kan Ṭhan Ding Ti’n Thuthannak Nei

NUG In Poipeng In Meeting A Ko, Dothlengnak Kan Ṭhan Ding Ti’n Thuthannak Nei

National Unity Government (NUG) in a kelte ih an tuah mi cozah bur thurelkhawmnak cu cawl in rampi Acting President Duwa Lashila, Prime Minister Man Win Khaing Than pawl le ramdinkhawm vuanzi pawl telin poipeng thurelkhawmnak an tuah ih rualpi thazang komkhawm zate ṭangtlang in ramkhel zindaan, ram palai zindaan, raldo zindaan ti’n a kilkip hmangin dothlengnak kan ṭhan ding ti’n thu an suah tiah DVB in July 26 ah a tarlang.

Myanma democracy thuhla ih hruaitu pawl a si mi U Kyaw Min Yu @ U Jimmy, U Phyo Zeyar Thaw, U Hla Myo Aung le U Aung Thura Zaw pawl cu tharum hmang SAC ralhrang in an thah hnu rampi hruaitu an kaih mi pawl, democracy thuhla ih cangvaitu zate ih nunnak cu thinphang dinhmun a si thu thawn pehpar in lungrual ten letrul dan ding thuhla pawl an relkhawm thu theih a si.

NUG cozah Prime Minister Man Win Khaing Than cun cozah ih thuthan mi pawl, thurelkhawmnak pawl ih dungah a hngetkhoh mi tawlrelnak pawl cu felfaite’n a telcih ding a si tiah a sim.

Cuihlei ah mipi pawl cu a phunkim in nunrawng zetin an thah lawng si lo in democracy thuhla cangvaitu, dothlengnak hruaitu pawl cu olsamte ih an thahnak ruangah a rapthlakbik mi langtertu tharum hmang ralhrang hruaitu Min Aung Hlaing le a hnaṭuanpi pawl cu daan vekin an ngah ding mi sualmawhnak bikhiah thei ding khal NUG cozah in a tawlrel ding tiah a sim.

July 25 ah SAC ralhrang thuthangca pawl ihsin an that timi nemhngetnak thu an suah hnu American, Britain, Europe le UN telin leitlun ram pawl in an namthla ih Myanmar ralhrang nunrawng an si thu, thusuah an tuah cio. Ramtinkim ih soiselnak pawl cu SAC ralhrang ihsin letrulnak a um hrih lo.

Myanmar ralhrang pawl in bomb in khawsung an kap, mawhnak nei lo mipi pawl cu ramsung hmun tinkim ah an kaih vekin thihdaan an pekmi mi (100) leng lo khal that ding dinhmun an si ruangah thinphan a si thu Myanmar ram thawn a pehpar mi UN milai covo ace palai Tom Andrew in asim.

Myanmar ram ah dik lo zetin thuneihnak an laknak kumkhat le hrek hrawng a rei ah SAC ralhrang pawl in tharum hmangih an kahthahnak ruangah ram pumpi ah mawhnak nei lo mipi 2,120 le an kaih mi 14,870 tiang an um zo tiah AAPP in thu a suah. Cuihlei ah SAC ralhrang in thihdan an pekmi mi (117) an um thu khal AAPP ih thusuah mi ihsin theih a si.