Na Fate Thawn Pehtlaihawknak Ṭha Neih Na Duh Maw?

Na Fate Thawn Pehtlaihawknak Ṭha Neih Na Duh Maw?

Nu si hnu cun ei hawlnak, sungkua nuntu khawsaknak, pasal hrang le thil dangdang ah an buai thei na sa. Zing thawh ihsin ti ding neuhneuh a tam ih fate hrangah can awl neih a har ih fate karlak ah harsatnak phunphun a um duh zet.

Ziangtin ha fate thawn pehtlaihawknak ṭha zet kan neih thei ding?

It Zawng Ih Thuanthu Sim

Zan it zawng ih nauhak thuanthu sim hi nu le fate karlak ih pehtlaihawknak ṭha zet a si. Thuanthu ngai nuam zet le zirnak mi pe theitu si thei sehla a ṭha sinsin. Tlawng na kai lai ih na ton mi le thil dang na hmuhton mi pawl kha ngai nuam zet dingin sim ṭheu aw. Cu vekih na sim thei asile a rei hlan ah a thinlung ih um le a vei zawng tiang ṭha zetin a lo sim ding.

Nuam Zet Ih Tikholh

Nauhak in tidai tham le puah nuam an ti thei zet. Sahpian le shampoo nauhak hman mi thil pawl hman thei tum aw. Tikholh a buaithlak na ti asile a duh zawng hman ding pe aw la, tikolh phah in lungawi aipuang siamsi ten bia phah aw. Lehpi phah aw la, na thusim mi a theithiam lo a si khal le na cangvaih dan le aipuang zet na mithmai a hmuh hrimhrim kha a hrangah vitamin ṭha zet a si.

A Theih Mi Relter Aw

Tlawng ih an zir mi le Sunday School ih an zir mi thu le hla pawl kha siar/sakter sal aw. Hi mi hi TV a zoh mi, a hmuhton mi pawl tiang in a huap tel thluh. A sim thiam lo si maw, nal zohzoh in a siar thiam lo si maw, a ti sual mi ah hnihsan men lo ding. Thinsau zetin a ti phur dan thiam sawn ding a si. Hi mi na titer ṭheu ruangah mi hmai ih an din tikah rinsanawknak (Confidence) an nei ding. An ti sual pang khalah ningzak ih hnukdawk aw men ding a si lo ti anmah ten an theithiam mai ding.

Ei In Tuangtim

Nauhak hi an ti thei zawngzawng tuan zetih an tuah thei le an thiam theinak ding tawlrel sak a ṭha. Coka ah hruai aw la a ti thei ding mi tuahter aw. A ti thei lo, a tuah thiam lo asile ti dan ding le tuah dan ding sim ih zirh ding a si. Na tuah mi le na ṭuan mi a hmuh kha a hrangah thil tampi a ṭangkai ding. Hmun phiah a thiam lo asile hmun phiah la dingin na fial thei, thil ṭha a tuah mi lungawipinak ah thil pek mi nei ṭheu aw. Thil fate zet na pek mi in a thinlung sungah tum zetin hna a ṭuan ding.

Simlam Ih Lek

Zarh khat ah vei khat tal nuam zet in leknak tuah sak aw. Hi mi ah board games, word quiz, pictonary le Chinese chekcers tivek a phunphun tuah sak ding a si. Hi vek game pawl hi a nuam ih thluak a ti cak thei. Amah ten lekter lo in nuam zet le aipuang zetin lekpi aw.

Hi mi pawl in nu le pa hi thil mak lo te khalah thuron le mi telpi thei an si ti anmah ten an thei lohli mai ding. Nauhak thil men ih lang khal lungawi aipuang zetin an telpi ti an thei ding. Nan karlak pehtlaihawknak khal a ṭhangso vivo ding. // The Zozam Post (April 3, 2019)