Myanmar Ralhrang Le SSPP Karlak Boruak A Sosang Vivo

Myanmar Ralhrang Le SSPP Karlak Boruak A Sosang Vivo

Shan ramkulh thlanglam Mynshu peng (မိုင်းရှူး မြို့နယ်) sungah ralhrang in an thazang an tamter ih ralhrang le Shan State Progressive Party (SSPP/SSA) karlak boruak a sosang tiah
Mynshu peng (မိုင်းရှူး) tualsung mi pakhat hnen ihsin an theih thu Irrawaddy thuthang in a tarlang.

Ralhrang pawl cu July 25 ihsin Mynshu peng (မိုင်းရှူး) le တန့်ယန်း peng lam ah ralhrang motor tam zet le raldonak trank an kuat ih ralhrang thazang an tamter. Tunaite ah ralhrang pawl မိုင်းရှုး ah an kuat ih raldonak trank 7 a tel. မိုင်းရှူး saklam ih um တန့်ယန်း peng khalah raldonak trank a mal bik 3 an kuat tiah မိုင်းရှူး tualsung mi le ramhrin miphun hliakhlaitu hrekkhat in an sim.

A hlan khalah မိုင်းရှုး khawpi thlanglam ih um မိုင်းစံ, ကွန်ဟိန်း le ကာလိ khawpi ah ralhrang motor 16 hnakih mal lo မိုင်းရှုး khawpi ihsin an kuat tiah tualsung mi pakhat in a sim.

“မိုင်းရှူး khawsung ah ralhrang battalion 1 a um. မုံးပေါ် khawte lam khalah ဗျူဟာ tonak battalion 1 a um bet. ကာလိ nisuahnak a lai hrawng ah ralhrang tampi an kuat. Khat lam khat lam in an timlam aw ti theih a si. Khat lam ah SSPP thawn thureltlannak boruak a tha lo ruangah ralkap thazang in an lehrul ding vek khi a bang” tiah a sim.

မိုင်းရှူး peng ih saklam လွယ်နိုင်း hmunram ah SSPP in sakhan 3 an nei. Cu mi cu ralhrang pawl in sakhan 3 suah san ding in July 21 a neta bik bikhiah in SSPP hnenah theihternak an nei. Ralhrang lungrualnak le remdaihnak (NSPNC) Chairman ih hohanak in ralhrang palai pawl in မိုင်းရှူး peng nitlaknak thlanglam SSPP hotu pawl cu July 14 ah an ko ih thu an reltlannak ah sakhan suah san ding in an dil. Hi thu thawn pehpar in SSPP in sakhan an suah san thei lo ding thu July 20 ah NSPNC chairman hnenah theihternak an nei sal. SSPP in sakhan an suah san duh lo ruangah မိုင်းရှုူး khawpi le တန့်ယန်း khawpi ah ralhrang thazang an tamter tiah theih a si.

SSPP thawn a naihniam mi online thuthang pakhat cun ralhrang pawl လားရှိုး၊ ကျိုင်းတုံ le ခိုလမ် hrambun battalion 3 cu လွယ်နိုင်း hmunram ah an burkhawm aw tiah Shan ca in an ngan. SSPP lam khal ralhrang pawl ramri lan ih an rat ruangah kilhim aw ve dingin SSPP battalion 3 cu လွယ်နိုင်း hmunram ah ralring cia in an um. Kahawknak ziangtik khalah a suak thei tin mipi le ralkap ralring ten an um tiah an sim thu Irrawaddy thuthang in a tarlang.

SSPP thuthang le theihternak zung facebook khalah raldonak vanzam ih bomb thlak mi ihsin luat thei dingin Shan tong in July 26 ah mipi theihternak an nei tiah a tarlang bet.