Kalaymyo Thlanglam Ni 5 Sung Kahawknak Ah Ralhrang Mi 7 An Thi Ih Hriamtuar An Tam

Kalaymyo Thlanglam Ni 5 Sung Kahawknak Ah Ralhrang Mi 7 An Thi Ih Hriamtuar An Tam

Kalaymyo thlanglam Chaungkhuah khaw kiangkap ah mipi kilhimtu tangtlang le ralhrang ni 5 sung an kapaw ih ralhrang lam mi 7 an thi, hriamtuar an tam. Ralhrang pawl in Chaungkhuah khua ah inn 12 an ur kang tiah theih a si.

August 8 ah Kalaymyo thlanglam Tayakung khua ih ralhrang bukhuar pawl le GTC tlawng in ralhrang 150 hrawng nitlaknak lam ihsin feh pawl cu sun nazi 12 hrawng ah ကျွန်းချောင်း khua le အနောက်စံသာ khua karlak ah PDF (Kalay) Battalion (3), battalion (6), battalion (8), battalion 12 le CDF-KKG tangtlang in an rak kap. Minute 30 hrawng an kapaw ih ralhrang lam mi 4 an thi. Mipi kilhimtu tangtlang pawl thi le hriamtuar um lo dingin dung an sip sal tiah PDF (Kalay) in a tarlang.

Ralhrang pawl cu ကျွန်းချောင်း khua le အနောက်စံသာ ihsin thlanglam ah an feh vivo ih Chaungkhuah khaw kiangah mipi kilhimtu tangtlang pawl thawn an kapaw bet. August 12 zing nazi 11 ihsin simlam nazi 5 tiang PDF (Kalay) Battalion (1), battalion (2), battalion (5), battalion (6), battalion (7), ပ.က.ဖ (Kalay) le CNDF pawl in na sa zet in an kap. Kahawknak ah ralhrang mi 3 hrawng an thi ih PDF (Kalay) in bomb an rak puah ruangah hriamtuar an tam an zum thu khal an tarlang tel.

Simlam 5 hrawng ah ralhrang pawl cu Chaungkhuah khawsung ah an lut ih inn 12 an ur kang. August 13 zing ah ralhrang pawl cu Kalaymyo thlanglam ah an feh vivo tiah tiah PDF (Kalay) ih tarlang mi ihsin theih a si.