Kalaymyo Thlanglam Ah Kahawknak A Sosang Vivo

Kalaymyo Thlanglam Ah Kahawknak A Sosang, Mipi Kilhimtu Mi 2 Nunnak Liam

Kalaymyo thlanglam ah kahawknak a sosang, July 11 ihsin July 13 tiang, ni 3 sung na sa zet in an kapaw. Kahawknak ah mipi kilhimtu mi 2 in ram le miphun hrangah an nunnak an liam. Ralhrang lam mi 21 an thi ih hriamtuar an tam tiah theih a si.

Vakok CNDF cun “Kan ralkap miraltha ram le miphun hring ih nunnak hlantu pawl hrangah thisen leiba kan rul sak” tiah an tarlang.

Kalaymyo thlanglam ah ralhrang pawl in operation an nei ih mipi kilhimtu tangtlang (CDF-KKG, CNDF, PDF Kalay, RKDF, ပကဖ) thawn July 11 ihsin an kahawk thu CDF-KKG ih tarlang mi ihsin theih a si.

July 8 ah ralhrang 160 hrawng cu Hanthawaddy ihsin Kalay lam ah operation nei dingin ke in an feh. July 11 sun nazi 12 hrawng, Hakhaly khaw kiangah mipi kilhimtu pawl in an rak kap. Nazi 1 sung na sa zetih kahawknak ah Vakok-CNDF Salai Lal Biak San (Kum 37) ram le miphun hrangah a nunnak a liam. RKDF pakhat in na zet in hriam a tuar, ralhrang lam thi le hriamtuar ziangzat an um ti theihfiang a si lo tiah Vakok- CNDF in a tarlang.

Hakhaly phungki tlawngah ralhrang pawl zan 1 an riak ih July 12 zinglam ah Sitha khaw lam ah an feh. Mipi Kilhimtu pawl in an rak bawh sal ih Sitha khua ih thlanglam ah an kapaw. Thi le hriamtuar um lo in mipi kilhimtu pawl dung an sip tiah theih a si.

July 13 ထောက်ကြန့် khua le Tazakung khaw karlak ih kahawknak ah PDF-Kalay Battalion (2) ဆန်းမင်းငွေ (Kum 24) cu ral hmainornak ah ram le miphun hrangah a nunnak a liam tiah PDF-Kalay Battalion (2) in a tarlang.

Zing nazi 8:59 ihsin sun nazi 1 tiang, nazi 4 sung kahawknak ah ralhrang 6 an thi, bomb puah mi ruangah ralhrang mi 15 an thi ih hriamtuar an tam. CNDF lam mi pakhat bese tuk lo in hriam a tuar tiah Vakok-CNDF ih tarlang mi ihsin theih a si.

Ralhrang pawl in tualsung mi nunau pakhat an kap ngah tiah Vakok CNDF in a tarlang.