Kalaymyo Taungphila Veng Ah Mipi Kilhimtu Pawl In Ralhrang Bomb An Puah, Mi 10 An Thi

Kalaymyo Taungphila Veng Ah Mipi Kilhimtu Pawl In Ralhrang Bomb An Puah, Mi 10 An Thi

Kalaymyo khawsung mipi kilhimtu pawl in August 5 ah ralhrang motor bomb an puah ih mi 10 an thi. Ralhrang pawl in tualsung mi pakhat an kap ngah tiah theih a si.

Zinglam nazi 9:30 hrawgah Taungzalat veng ကျန်စစ်သား lamzin ihsin Taungphila veng cozah hnatuan pawl umnak lam ih feh ralhrang motor 2 cu Taungphila lamzin le cozah hnatuan umnak zinpial ah PDF (Kalay) in bomb an puah. Motor sungih ralhrang mi 6 a hmun ah an thi cih, mi 4 hriam an tuar ih sizung an fehpi nan lamzin ah an thi tiah PDF (Kalay) in an tarlang.

Ralhrang pawl in kiangkap an kap ciamco ruangah tualsung mi pakhat an kap ngah ih hriam a tuar tiah theih a si.

Kalaymyo thlanglam ကမ်းပါးနီ lilawn kiang ih bukhuar ralhrang mi 30 hrawng in မြောင်းချောင်း lilawn lam ah lilawn kiangih PDF pawl bomb kam mi an phelh rero lai ah PDF (Kalay) in bomb an ti puak ih ralhrang mi 10 hrawng an thi, mi 10 hnakih tam hriam an tuar. Zinglam nazi 10:30 hrawng ah ကမ်းပါးနီ lilawn kiangah helicopter 1 a tum ih thi le hriamtuar pawl a phur tiah PDF (Kalay) in an tarlang.

August 5 nikhat sungah ralhrang mi 20 hrawng an thi, August 1 ihsin 5 tiang, tui zarh sungih Kalay peng sung ralhrang le mipi kilhimtu kahawknak ah ralhrang mi 65 an thi ih hriamtuar an tam. Tualsung mi sualmawhnak nei lo mi 4 ralhrang pawl in an that tiah PDF (Kalay) ih tarlang mi ihsin theih a si.

Kalaymyo thlanglam GTC tlawnginn ihsin Tayakung khua ih bukhuar ralhrang pawl in August 5 khalah inn an ur bet. Khawsung mi 3 an that zo ih mi 30 hrawng an kaih mi khal an suah hrih lo. Kalaymyo saklam ရာဇဂြိုဟ် khua, August 4 simlam ih ralhrang lut pawl in August 5 zing ah khawsung inn an coklet ih an ur kang. Sualmawhnak nei lo tualsung mi pakhat an that tiah PDF (Kalay) in an tarlang.

Kalay peng ah ralhrang le mipi kilhimtu karlak ah boruak a sosang ih lamzinpi feh sukso can ah si seh ralring ding le ralhrang motor kiangah um lo dingin mipi kilhimtu pawl in mipi theihternak an nei tiah theih a si.