Kalaymyo Saklam Le Thlanglam Ih Kahawknak Ah Ralhrang Thi An Tam Ih Mipi Kilhimtu Mi 3 An Nunnak A Liam

Kalaymyo Saklam Le Thlanglam Ih Kahawknak Ah Ralhrang Thi An Tam Ih Mipi Kilhimtu Mi 3 An Nunnak A Liam

Kalay peng ah ralhrang le mipi kilhim kahawknak a sosang ih Aungust 2 ihsin ni 4 tiang, ni 3 sung na sa zet in an kapaw. Ralhrang thi le hriamtuar an tam ih mipi kilhimtu tangtlang mi 3 an nunnak an liam tiah theih a si.

Kalaymyo saklam le thlanglam ni 3 sung, ralhrang le PDF (Kalay) battalion 1, 2, 5, 6, 7, 8, 12, ပ.က.ဖ (Kalay), CNDF, CDF-KKG le RKDF tangtlang kahawknak ah ralhrang 45 hrawng an thi tiah PDF (Kalay) ih tarlang mi ihsin theih a si.

August 4 zing nazi 9 hrawng ihsin Tayakung khua le a kiangkap ah ralhrang le mipi kilhimtu tangtlang na sa zetin an kap aw. Tharum hmang SAC ralhrang lam ihsin GTC phunsang tlawng sung le Kalaymyo hmunram ralhrang zungpi ihsin ralthuam tum thawn Tayakone khua le Htauhkyant khua lam hoi in cat lo in an kap bawm. Mipi kilhimtu tangtlang pawl khalin GTC phunsang tlawng lamah ralthuam tum in vei tam zet an kap. August 3 le tuini simlam tiangih kahawknak ah ralhrang lam mi 15 hrawng an thi ih hriamtuar an tam tiah PDF (Kalay) in an tarlang.

Kahawknak ah mipi kilhimtu tangtlang lam ihsin PDF (Kalay) 1, ပ.က.ဖ sungtel mi 2, an zaten mi 3 an nunnak a liam. PDF (Kalay) mi 10, CNDF-Vakok mi 2, ပ.က.ဖ mi 4 le RKDF mi 1, an zaten mi 17 in hriam an tuar tiah theih a si.

Ralhrang pawl in simlam hrawngah Tayakung khua ah inn ziangmawzat an ur kang. Inn an ur kang zat felfai ten theih a si hrih lo.

Kalaymyo saklam khalah Tamu ihsin Kalay lam ih feh ralhrang motor 14, mi 60 hrawng cu zianglam nazi 11 hrawngah 55 pengthuam le ရာဇဂြိုဟ် karlak, သုံးလောင်းကွေ့ kiangah PDF (Kalay) in bomb vei 12 a pehpeh in an puah ih ralhrang mi 20 hrawng an thi, hriamtuar an tam. Ralhrang pawl cu (55) pengthuam khaw kiangkap ah sualmawhnak nei lo tualsung mi hrekkhat an kai. Simlam nazi 6:30 hrawngah ရာဇဂြိုဟ် khua lam ah ralthuam tum cat lo in an kap tiah theih a si.

Tayakung ih ralhrang bukhuar pawl cu August 3 simlam nazi 5:30 hrawngah mipi kilhimtu pawl in an va kap ih zan nazi 8:30 tiang na sa zetin an kapaw. Ralhrang pawl in ralthuam tum in an kah ruangah mipi kilhimtu tangtlang pawl dung an sip sal.

August 2 khalah Tayakung khaw kiangah ralhrang le mipi kilhimtu tangtlang nazi 6:30 ihsin simlam nazi 3 tiang na sa zetin an kapaw. Kahawknak ah ralhrang mi 10 hnakih mal lo an thi ih hriamtuar an tam. Sun nazi 2 hrawngah ralhrang pawl cu Tayakung khua ah an lut ih tualsung mi 10 hrawng an kai, mipa 1 an that tiah PDF (Kalay) ih tarlang mi ihsin theih a si.