Kalaymyo Ih Ni 2 Sung Kahawknak Ah Ralhrang Mi 35 An Thi, Mipi Kilhimtu Lam Mi 3 Hriamtuar

Kalaymyo Ih Ni 2 Sung Kahawknak Ah Ralhrang Mi 35 An Thi, Mipi Kilhimtu Lam Mi 3 Hriamtuar

Kalaymyo ih ni 2 sung (April 10, 11) kahawknak ah ralhrang a mal bik mi 35 an thi, CNDF mi 3 hriam an tuar tiah theih a si.

Kalaymyo thlanglam Natchaung khua ih ralhrang bukhuar pawl le PDF (Kalay), CNDF, CDF (KKG), ပ.က.ဖ tangtlang cu April 11 zing nazi 6 hrawng in simlam nazi 3 tiang an kapaw ih ralhrang mi 6 an thi, CNDF lam mi 2 hriamtuar lakah pakhat sawn cu a hriamtuar mi a naa lo tiah PDF (Kalay) a tarlang.

Ralhrang pawl bawm dingin Kalay Technological University ih bukhuar ralhrang mi 30 hrawng feh cu April 11, zing nazi 10 hrawng ဇင်းကလင်း le Technological University karlak ah PDF (Kalay) in bomb an rak puah ih mi 3 a mal bik an thi tiah theih a si.

Simlam nazi 3:30 hrawngah Natmyaung ihsin Sitha khua lam ih feh, a neta bik motor cu PDF (Kalay) in an kam cian mi bomb vei 24 an ti puak ih ralhrang 10 hrawng an thi. Sitha le ကြာအင်း khaw karlak bom vei 29 an puah bet ih a mal bik ralhrang 9 an thi. ချင်းဆိုင် le ဇင်းကလင်း khaw karlak bomb vei 12 an puah lala ih ralhrang mi 5 hawng an thi tiah theih a si.

Khawthim lam nazi 6 hrawngah ralhrang pawl Kalaymyo khawsung an lut. A hrekkhat Sitha khua ah an cam bet.

Ralhrang pawl in April 10 ah Aung Chan Thar khua ah အခြေခံပညာမူလတန်းကျောင်း inn 1 an ur, April 10 le 11 ah Natchaung khua ih ပညာ့ဗိမာန်ကိုယ်ပိုင်အထက်တန်း tlawng telin inn 85 an ur kang.

April 10 sun nazi 12 hrawngah ralhrang mi 150 hrawng cu Kalaymyo thlanglam ရန်ကြီးအောင် ihsin Chaungkhuah le Natchaung khua lam ah operation nei in an um. Ralhrang ei in phurtu thilri phurhnak motor 20 hrawng, a netabik ih feh motor cu simlam nazi 4 hrawngah Pan Mon Chaung lilawn kiangah PDF (Kalay), CNDF le CDF (KKG) in bom an rak puah.

Simlam nazi 6:30 hrawngah ralhrang le mipi kilhimtu tangrual pawl an kapaw bet ih ralhrang mi 2 an thi. CNDF mi 1 na tuk lo in hriam a tuar tiah PDF (Kalay) in an tarlang.

Photo:PDF (Kalay)