Kalaymyo Ah Ralhrang Pawl In Tualsung Mipa Pakhat An Kapthat

Kalaymyo Ah Ralhrang Pawl In Tualsung Mipa Pakhat An Kapthat

Kalaymyo, Mingala Oo Zin veng ah Tun Naing Lin (Kum 21) mi cu September 10 zan ah Pyusawhti pawl in meithal in an kap that tiah tualsung mi pawl in an sim.

Tun Naing Lin hi a rualpa thawn bike pakhat in an inn lam pan in an thlung. Pyusawhti pawl in an dung in an dawi ih meithal in an kap, a rualpa khal an kap ngah ih an kai. Cui pawl cu ralhrang uniform mi 2 in an hruh, pakhat cu uniform hruh lo a si thu tiah theih a si.

“An inn tlunnak zin pakhat lawng a um. Sizung lam zin an kham ruangah lamzin dang a um lo ih Mingala Oo Zin lam in an hel. PDF a si lo, mipi menmen a si. A pa hi motor tuahnak ih hnatuan a si ih a pa hnatuan bawm theu a si” tiah a rualpi tha pakhat cun a sim.

Hi thu thawn pehpar in ralhrang thuthang cun Kalay khawsungah kilhimnak tuah rero lai a si ih Mingala Oo Zin vengah bomb kam PDF an kai. PDF ruak pakhat, bomb 4 le Wire hri kual 2 hmuh a si thu an tarlang.

Ralhrang le pyusawhti pawl in August 22 ah PDF lemcang in vei 2 ruk an ru zo. Lamzin ah khawsung mi vak an cek ih phuahhlam a phunphun thawn mi an kai, paisa an kuanter theu tiah theih a si.