JACK MA Ih Nun Zalamtluan Le Mino

JACK MA Ih Nun Zalamtluan Le Mino

Ṭuan Thawm Thang

English Calai Thiam Ruangih Billionaire Hung Cang Alibaba Company neitu Chinese Miphun

China ram ih rethei zet pakhat hi tlawng ah English calai an zirh lo ruangah English calai le ṭong cu ram dang mi, English pawl (Tourists) hnen ihsin kum 9 sung rori a rak zir. Tlawng ih camibuai ah a rak sung deuh ringring ṭheu. Degree a ngah thluh in company tam zet ah hna a dil ṭheu ko, asinan hnaṭuan a ngah thei dah lo. Nikhat cu zirsangtlawng (University) pakhat ah thla khat US $ 12 in English zirlai, calai zirhtu hna a ngah. Nikhat cu a tum cia le theih cia mi si lo in English ṭong thiam an rak um zarah ṭong lehsaktu dingin America ram ah rinlopi’n a thleng ta riai. Cuih ṭum ah ‘Internet’ ti mi hi a thei in a hmu fangfang. Cu tikah a rak thiam zet mi English calai hmang ṭangkai in ‘Internet’ cun China ram le thlanglam (Western) ram pawl ih thilri pawl rak zuar sawngsaktu palai, hnaṭuan dan ding cu khawruahnak thar a nei. Cuticun Alibaba company thar cu a hun din. A neta lamah Alibaba cu nitin dollar billion tiangih thilri lei le zuar sawngsaktu company tumpi ah a hung cangih anih khal China ram ih milian maktara, billionaire pakhat ah a hung cang ve. Cumi pai hmin cu zo dang si loin Jack Ma a si.

Jack Ma cu a hringnun ih hlawhsamnak phunphun thawn an rak tongaw ve dah. Cumi thuhla thawn pehpar in amah cun thusuhnak (Interview) an tuahnak pakhat ah hiti hin a rak sim.

“Ka hringnun ah hlawhsamnak tampi ka rak tong. Hramthok tlawng (Primary School) ah vei 2 ka rak sung. Lailak tlawng (Middle School) ah vawi 3 ka sung. Zirsangtlawng (University) luh theinak ding camibuai khalah ṭum 2 rori ka rak sung fawn. Zirsangtlawng luh theinak ding camibuai ah kanan/siarkawp (Mathematics) ka sung ruangah ka rak lut thei lo. Siarkawp/Kanan zirlai hi zuam le taima zetih ka beih ciamco hnu lawngah a vei 3 nak camibuai tuahnak ah zirhtu si theinak ding zirsangtlawng kai theinak hi ka rak ngah ve fang.

America ram ih zirsangtlawng ṭha le hminthang zet, Harvard ah lut thei ding hin vawi 10 rori ka rak dil, asinan a ṭum 10 rori in hnawn mipawl lakah ka rak tel. Kum 1988 ah degree ngah in hnaṭuan tamtak ka rak dil ih Company-30 ah ka hun dil, asinan pakhat hmanah hna ka ngah lo. Palik ih lut dingin vei 2 ka dil; mi 5 dil mi lakah minung 4 lawng an hril, keimah lawng hi ngah loin ka tang lala. American arsa kionak company KFC dawr pawl cu China ram ah ra lut in dawr an rung awng. Manager ṭuantu ding hrangah mi 24 cun interview a si, a hlan bangtukin keimah lo hmuah mi 23 cu hril tlin an si lala” tiah amah cun hnih suamsi phahin a sim. Hitivekih hlawhsamnak tam zet, a rak ton zo ruangah lehhnu lamih hna a ṭuannak ah hlawhsamnak ti mi hi ṭihnak thinlung nei nawn loin ralṭhatnak lamih a hmandan thuhlapawl khal a sim bet fawn.

Mino pawl hnenih Jack Ma’i thucah tawi:

1. Kum 20 na kim hlanah tlawngta fel le ṭhatak si tum aw.

2. Kum 20-30 karlakah nangmah lo kaihruai ṭha theitu, zirh theitu ding le kilkhawi theitu ding pakhat khat hnenah zir aw phah in hnaṭuan aw.

3. Kum 30-40 karlak ahcun nangmahte in hnaṭuan pakhat lole company pakhat tal din suak thei tum aw.

4. Kum 40-50 karlak asile hnaṭuan dangdang ih ṭhawn deldel nawn lo ding; ziangruangahtile hlawhsam a olte a si, hnaṭuan na thiam le theihfiang zet mi lawng hi tuahṭuan thlang aw.

5. Kum 50-60 karlak na si ahcun mino pawl thu ṭha, hla ṭha sim le zirhnak in na tikcucan hmang thlang aw, ziangahtile nangmah ai ih an cah le hna an ṭuan tam thei sawn ruangah a si.

6. Kum 60 hnu lam hi cun pension la in tipithuanthum kap ah cawlhahdam huahhi thlang aw ti in hnih siamsi phah in thu a cah hai.

Jack Ma ih hminsintlak kamsuak

1. Sankhat nun ah veikhat te tal hi cu na tuah duh le paihzawng tak hun ṭuan ve hnik aw. Na tuahṭuan cengmang khalah a ṭha theibik dingin zuam le taima ṭenṭo awla maw! Taimak le zuam ruangah a tha lo, a sual ti mi hi a um dah lo.

2. Tuini cu nikhua a ṭha lo, khua a thim. Thaisun ahcun a thim sinsin ding. Sikhalsehla, tipsun lamah cun ni eng mawite a hung suaksal mai ding. Tuini, thaisun ih na bei a rak dawng a si ahcun ni suak eng mawite hi ziangtik hmanah na hmu dah lo ding.

3. Buai le harsatnak ton ruangah vuivai le phunnawi ding a si cuang lo, na lungawi sawn aw. Harsatnak le buainak lakah hin tikcucan remcang le canvo ṭha hi a phumaw in a um ruangah a si.

4. Na beidawn hlan kulh sung hi cu na hrangah ruahsannak tikcucan remcang a um. Na ban san a si ahcun cui canvo ṭha cu a um nawn loih na hrangah thil sual tumpi na tuah ngah rori tluk hi a si ko.

5. Mah zuam rerotu pawl hi zawihnit rero in hliakhlai hai nasa aw. Sihmansehla, anmah pawl tuahṭuandan vekin cawng in tuah ve pang aw hlah. An tuahṭuandan na cawn ve ahcun na tlasia zo tinak tlukin ruah mai ko-aw.

6. Kum zabi-21 ah hlawhtling ding hin na hnaṭuantu pawl hi nangmah ai hnakih thei le thiam si ding rori hi an si.

7. Keimah hi Jack Ma mi aa (Crazy Jack Ma) tiah in ko, a dikin a hman zet. Atthlak zet ih ka tuahṭuan ṭheu hrangah mi aa ti ih kawh cu pawi ka ti lo lawlaw. Amahlawngte, keimah hi thluak nei lo mi aa cu ka si ve riai lo.

8. Ziangtivek dinhmun khalah hin rak thleng bangta awla: ziangtivek kiangkap boruak karlak khalah pitling in ṭhanglian awla; zirthiamnak lamah ziangtivek dinhmunah rak si khal awla, na ṭhangso thei thotho a si. Himi hi vanṭhatnak ruangah cun a si riai lo. Na zuamnak, taimaknak, thahnemngainak, phurnak le a sung pe (beidawng) loih na thinlungput dan ruangah a si sawn.

9. Milai pawl ih tuahṭuan paih lo bik mi sungah tikcucan remcang le ṭha hi a rak um ṭheu.

10. Zianghman tuahṭuan-lo tikah a fiang zet mi cu thil zianghman hi a hung cangsuak dah zik-lo.