Hlaing Peng Ah Ralbawi Nupa An Kap That

Hlaing Peng Ah Ralbawi Nupa An Kap That

Yangon ramthen Hlaing peng, ပိတောက်ချောင်း 2 veng, ဘုရင့်နောင် 9 lamzin, July 18 zing nazi 9:30 hranwgah ralbawi nupa cu motor sungah meithal in kah that an si thu theih a si.

ဗိုလ်ကြီးအောင်နိုင်ဖြိုး (Kum 35 hrawng) le a nupi မဂျူးဂျူးအောင် cu ralhrang kilhimnak thilri tuahnak cet zung ih an fehlai ah kah thah an si thu Irrawaddy in a tarlang.

Ralbawi nupa hi Mingalado a hmat (1) ralhrang sizung ah an kuat, an thinak kiangkap pawl cu ralhrang tam zetin in motor pawl an kham thluh ih cekfelnak an tuah tiah DVB in a tarlang.

Yangon ah July thla thok ihsin ralhrang lam tang, veng lal le khaw lal pawl thianfainak an tuah rero ih ralhrang ralbawi pakhat an kap that zo, a hmaisa bik an thah mi khal a si tiah BBC ih tarlang mi ihsin theih a si.

Yangon hrambun a thupthiar ih mi dotu ANONYMOUS Urban Guerrillas in Hlaing peng ih ralbawi nupa an thah thu, ralhrang kut hnuai ih hnatuan, ralhrang hnenih thuhla simtu pawl cu an thianfai vivo ding thu an telegram ah an tarlang.

July 15 khalah မင်္ဂလာတောင်ညွန် peng ih thuthentu ဦးစန်းလင်း an ti mi khal a thupthiar ih mi dotu pawl in meithal in an kap that. Thuthentu hi ramkhel thubuai thawn pehpar in ralhrang duh dan tawlreltu a si ruangah a thupthiar mi dotu pawl in an that tiah Myanmar Now ih tarlang mi ihsin tarlang.