Chindwin Tiva Ah Ralhrang Pawl In Ralthuam Phurhnak Ih An Hman Theu Ruangah Mipi Kilhimtu Pawl In An Kap

Chindwin Tiva Ah Ralhrang Pawl In Ralthuam Phurhnak Ih An Hman Theu Ruangah Mipi Kilhimtu Pawl In An Kap

Ralhrang pawl in Chindwin tiva hmang tangkai in ralthuam an phur theu ruangah mipi kilhimtu pawl in an kap ih thi le hriamtuar an tam tiah Myanmar Now in a tarlang.

Sagaing ramthen Monywa peng ihsin suak ralhrang long cu August 6 ihsin Chindwin tiva tluan an zawh ih mipi kilhimtu pawl in an rak kap. Ralhrang 200 hrawng in ei in le bike pawl an phur. Long pakhat in thilri a phur, long 3 cu ralhrang ta a si. Long a suah ni ihsin မင်းအို, ကနီ khua, မြွေပိုင်း tlang kiang, ပဲခင်း khua, ကဲထောင့် khua le ကင်း khaw kiang pawl ah an rak kap tiah mipi kilhimtu pawl in an sim.

Dothlengnak ah meithal, ei in le sumpai lam ahcun ralhrang pawl thawn an thlau aw zet nan tu ahcun meithal an nei tha vivo. A hlan ahcun mine le lai meithal rinsan in mipi kilhimtu pawl in ralhrang an rak do theu.

Mipi kilhimtu pawl in a hlankhan in tanhmun an rak la ih sniper le ralthuam tum in an rak kap. Ralhrang thi le hriamtuar an tam, long 2 a siat tiah mipi kilhimtu pawl in an sim.

“Ralthuam tum cu an long kah siatnak ah kan hmang, sniper le meithal kan hmang tam sawn” tiah Kani hrambun ကျောက်လုံးကြီးတပ်မဟာ ih thusim theinak tuanvo neitu in Myanmar Now hnenah a sim.

Mytel tower tanglam ih um ပိုက်လုံး ih tuah mi ralthuam tum, miter 200 hrawng hla kap ban thei mi in long kan kap tiah a sim bet.

Ralhrang long cu August 9 ah မင်းကင်း peng, Phuysawhti pawl tamnak ပန်းဆက် khaw kiang an thleng tiah theih a si.

Sagaing ramthen Kani le ယင်းမာပင် peng cu doawknak hmun, hmunram him lo a si. Chindwi tiva hi ralhrang pawl hrangah cun ei in le ralthuam phurhnak hrangah remcang zet a si thu Myanmar Now in a tarlang.