Chin Ramkulh Ah Palpuah Bomb Ruangah Tualsung Mi 20 An Thi Ih Hriamtuar 37 An Um

Chin Ramkulh Ah Palpuah Bomb Ruangah Tualsung Mi 20 An Thi Ih Hriamtuar 37 An Um

Ralhrang in Myanmar ram thuneihnak an lak kum 2 luan sungah, Chin ramkulh ah palpuah bomb ruangih thi naunak le nunau tel in mi 20 an um zo, mi 37 in hriam an tuar tiah CHRO in an tarlang.

Palpuah bomb ruangah nauhak 1 le nunau 4 tel in an zaten mi 20 an thi. Nauhak 3 le nunau 11 tel in mi 37 in hriam an tuar.

Ralhrang in thuneihnak an lak 2021 ihsin 2023 tiangah Chin ramkulh sungih palpuah bomb ruangah thi le hriamtuar Falam peng ah mi 11, Hakha peng ah mi 10, Thantlang peng ah mi 3, Tedim peng ah mi 9, Mindat peng ah mi 7, Matupi peng ah mi 9, Paletwa peng ah mi 7, Kanpatlet peng ah mi 1 an um tiah theih a si.

Ralhrang pawl in operation an nei can ah le doawknak a um can, khaw kiangkap le khawsung, hramlak le lamzin sir ah palpuah bomb an duhduh ih an kam theu ruangah mipi veivak le lo hnatuan hrang khalah harsatnak a tam ih hmunram a him lo tiah theih a si.