Chin Ramkulh Ah Biakinn Ih Khawm Dingin Ralhrang Hnenah Siannak Lak Tul

Chin Ramkulh Ah Biakinn Ih Khawm Dingin Ralhrang Hnenah Siannak Lak Tul

Chin ramkulh ih peng 8 ah ralhrang in Martial Law a phuan hnuah biakinn ih khawmaw dingin ralhrang hnenah siannak an dil a tul thu, a hlan zarh 1 duh ah siannak dil a tul thu, thupek an suah tiah theih a si.

Zarhpi ni (Sunday) ih khawmaw dingin DC zung (ခရိုင်အထွေထွေ အုပ်ချုပ်ရေးရုံး) ah siannak dil ding a si thu February 13 ah thupek an suah.

Biakinn khawm dingih dilawk ringring hi thil ol a si lo. Hi tivek ih an tuah mi cu biaknak lam palbetnak a si tiah tualsung mi pakhat in a sim.

Chin ramkulh Tedim, Tonzang, Falam, Kanpalet, Matupi, Thantlang, Hakha peng ah ralhrang in February 2, 2023 ih Martial Law a phuan hnuah zan nazi 6 ihsin zing nazi 6 tiang zohman leng suah a ngah lo ih curfew khal an phuang tiah theih a si.

Ralhrang in Martial Law an phuannak peng pawl ah mi 5 hnakih tam um khawm, khawlak vak khawm, thusim khawmnak, fung, nam, meithal le inn kang thei mi thilri ken sian a si lo.

Ralhrang thuneihnak kum 2 hnuah thla 6 sung an thuneihnak an than bet ih Chin ramkulh telin mipi kilhimtu thazang caknak peng (မြို့နယ်) 37 ah Martial Law an phuang. A hlan ih Martial Law an rak phuan zonak peng pawl thawn Myanmar ram pumpi ah Martial Law phuannak peng (မြို့နယ်) 44 a si zo tiah theih a si.

Photo: Mindat peng ih ralhrang duty