CDF- Mindat Ralthuam Ret Dingin Ralhrang Pawl In Mipi An Simter

CDF- Mindat Ralthuam Ret Dingin Ralhrang Pawl In Mipi An Simter

Ralhrang pawl in mipi a phunphun in a hmang tangkai ih CDF-Mindat pawl khal ralthuam retter dingin mipi an sawmkhawm tiah theih a si.

August 2 zinglam nazi 10 hrawngah ralhrang pawl in Mindat khawsung RC Biakinn compound sungah ဘဝသစ် veng le အရှေ့ပြင် vengsung mipi an kokhawm ih thu an sim.

“CDF pawl cu an ralthuam ret ih zatlang nunphung kel ten um dingin sawmkhawm dingah mipi an forh” tiah tualsung mi pakhat in a sim.

Mikhual thar khal zohman cohlang lo ding le a cohlang pawl cu kaih an si ding tiah mipi an hringhro thu theih a si.

July 31 ah Mindat senpi sizung ah nauhak kum 5 tanglam Covid kakuaisi an dawt sak ih Chin le Kawl cangan mi ca an zem. Cui ca cu khawnu khawpa, biaknak lam hotu hrekkhat in an zem. An ca ahcun NUG le CRPH lamtang pawl ralthuam ret ih zatlang nunphung kel ten um duh pawl cu an cohlan thu an ngan tiah tualsung mi pakhat in a sim.