Chin nauhakpawl le Covid Vaccine dawh

Chin nauhakpawl le Covid Vaccine dawh

Myanmar ram sungah 2021 kum ihsin Covid vaccine hi dawh thawk a rak siih ramkel thubuai ruangah dawt le dawt lo tiin kan um hnuaihni. Cutin 2022 kum ihsin kan ramhnen India tivek ah Nauhak Covid kai a luar vivo ruangah Myanmar ramsung Chin ram khalah nauhakpawl hrangah Covid vaccine hi an dawt thawk ve. Asinan, a dawt an tam lo nasa; rambuai le raltlan ruangah. A hleice in nauhak Covid vaccine dawh thu ah nulepa an thu pi zet. Thenkhat nulepa cun an lungkim ih an dawt, a duh lo ih dawt lo khal an um. A hleice in Chin ram ahcun Lai khua lam ih um pawl hrang dawh remlonak chance le dawt lo, an tam nasa.

Chin ramkulh ah Chin nauhakpawl Covid vaccine dawt an mal ih nat hrik dang a suak sal pang a si ahcun an hrangah dinhmun tha lo zet thlen theinak a tam. Myanmar ramsung buainak ruangah Lai khua lam ih um pawl hrang Covid vaccine dawt a ol-sam lo. Khawte lam ah harhdamnak lam cozah hnauan an um nawn lo hlei ah lamzin sukso a harsa ih lamzin a him lo ruangah harsatnak tampi a um.

Covid vaccine hi nauhak kum 5 ihsin dawt theih a siih Chin ramkulh pumhuap ah Chin nauhak zatek 10 luan hrawng lawng in Covid vaccine an dawt an zum thu harhdamnak lam uanvo neitu pawlin an sim.

Falam peng ih Covid vaccine dawt pawl cu Falam khawpi sungih um pawl lawng an si tlangpi. Khawte lam ihsin Covid vaccine dawt ding rori ih va pantu pawl hrangah dawt theih ringring a si. Asinan vaccine dawt dingih feh le pantu an um cuca lo. Khawte lam ah va dawt dingin harhdamnak lam hnatuantu pawl hrang khalah a harsa ih lamzin a him lo. Harhdamnak lam ih hnatuantu pawl le khawte lam ih mipi karlak ah bantonawknak, pawhtonawknak (pehtlaihnak) a harsa mi hin covid vaccine dawt lo an tam phahnak a si.

Falam peng ih nauhak Covid vaccine dawt 2021-2023 August 2, 2023 tiang ah First dose = 15731, Second dose = 14642, First Booster = 7911, Second Booster = 2608, Third Booster = 554 an si. Covid vaccine dawttu lakah mi pakhat in course kim le a um 2nak (First Booster) dawt an mal deuhdeuh.

Hi harsatnak um mi pawl ruangah mipi, nu le pa, nauhak thinlung ah vaccine dawt tulnak le thupitnak a niamter. Vaccine dawt lo ruangah buainak le damlonak ciamco a um cuang lo tikah vaccine dawt duhnak, thinlungah a um lo vivo. Covid vaccine sii dawt duhnak nei thei ding cun dinhmun harsa pakhat khat a thlen lawngah mipi thinlung ah Covid vaccine dawt duhnak a tum sinsin ding. Theihkauhnak (awareness) pekawk dan ding ciamco khal a um lo ih thil harsa zet a si.

Khawte lam ih um, a ra thei lo pawl cu kan dawt lo ah a cang. Covid vaccine sii lam ah harsatnak kan nei lo, asinan ramsung buainak ruangah khawte lam ah harhdamnak lam hnauan an um nawn lo ih lamzin a him lo ruangah a sii kan suah sak ngam lo. A dawt duh ngaingai pawl cun in sut hlam phah ko, kum hi zat kan dawt zo ih a dawt duh lo pawl cu ziang ti zawng khalin an duh cuang lo. An dawt duh ding cun kan dung lai vekih thih hluahhlonak vek, ihphan ding le pakhat khat a um ih nat a roh ti kan theih lawng ah kan dawt duh ding. Thih hluahhlonak a um lai ahcun vaccine dawt duh hi a tlar in an tlar aw, sii hi a daih le daih lo ih dawt a si, tu cu nat tla a zia um ruangah an ih nawn lo tiah Chin ramkulh ih harhdamnak lam uanvo neitu pakhat in a sim.

Covid vaccine an hman mi hi India tuah Covishield le China tuah mi Sinopharm a si. Khawte lam tiang ih Covid vaccine dawt thei ding cun NGO thawn uantlangnak um thei sehla dawt khal a theih ko ding nan NGO khalin Covid vaccine thawn pehpar in project an nei lo tikah tuan tlang dan khal a um thei lo. A thupi mi cu hmunram a him lo mi hi harsatnak tumbik pakhat a si.

Falam peng sung ih Covid vaccine dawt cazin zoh tikah Falam peng ah mipum thawngsawmnga luan an um, mi pakhat in a mal bik vei 2 cu dawt tul tengteng a si ih vei 1 lawng dawt, a vei 2nak dawt lo an tam. Vei 1 nak lawng dawt hi mi thawnghleinga kiangkap an si ahcun zatek ah 10 hrawng, zatek 20 hman a kim lo. Chin ram pumhuap khaikhawm khalin hmun kip ah Covid vaccine dawt a harsa thluh tikah nauhak Covid vaccine dawt khal mi malte lawng an si tiah theih a si.

Lairawn khalah June thla hrawng ihsin tlangrai ih dam lo tam thu theih a si. Innsang tin deuh thaw ah pakhat simaw, pahnih simaw, sungkaw-run in simaw dam lo an tam thu khal theih a si.

Covid vaccine hi lak (dawt) sal ding a si, tulai tlangrai kan timi khal hi ngaingai cun Covid a si ko. Kan dawh sal a tha ding tiin Lairawn Kalay community ih hruaitu pakhat cun a sim.

Laitlang thu khalah hitin a si. Kan dung June thla ah hmuan ka tuahnak ih hnatuantu hlawhfa ding um lo khawp in an na thluh tiin community ih rinsanmi upa pakhat tla in a sim.

Hihi hmuan a tuahnak kiang ih khua pakhat ah inntin deuh thaw ih dam lo an um thu, a sim mi a si.

Vaccine lak thu ah sii lam mi thiam pakhat in hitiin a sim.

A duh hrang ahcun dawh a tha. Duh lo hrang ahcun tha cuang hlah. Tulai tlang rai hi a test- result a um lo ahcun Covid ti ih ruah ding a si lo. A cang thei le, Covid vaccine dawh ding, kut khawlh fai le mask khal bun ding. Ralring ih um cu a sual lo. Tui hlan ruah cun a tuar kan mal. A tuar khal an um nan an tha sal. Covid hi cu a um ringring lai ding ih vaccine dawh le dawh lo thu ah cuai kan thlai ahcun a thatnak a tam sawn tiin a sim.

Chin mi tam zet umnak khawpi pakhat Kalaymyo ahcun 2022 kum ah bulpak tlawng pawl ah tlawngta nauhak tam zetin Covid Vaccine an rak dawh ih an dawhmi cu Myancopharm sii a si. Tui kum khalah Kalay ahcun cozah tlawng lam ah Covid vaccine dawh ding an ti thu khal theih a si. 2022 kum ihsin Lairawn ah cozah ih dawh, bulpak siizung ih dawh ti le NGO pawl ih tanpinak in biakinn le khawtlang hall ah Covid vaccine hi an rak dawh thu theih a si.

Chin ram ihsi raltlan ih Kawlram mi um tam biknak Mizoram khawpi Aizawl le Champhai ahcun 2022 kum ah raltlan khalin Covid vaccine an rak dawt thei, himi hnu ahcun thlah dul awknak le Covid hri a lang tuk lo ruangah lak hran a um nawn lo tiin theih a si.

Tufang leitlun ah mithiam tampi telnak pawlkom pawlin Vaccine la ih dawt cio dingin ram tin an forhfial nasa. UK khalah tu naite ihsin Covid mina an tam ciamco ih siizung it an tam zet, asinan mithi an um lem lo tiin theih a si.