SAC Ralhrang Bawi Mi 62 An Colhter

SAC Ralhrang Bawi Mi 62 An Colhter

SAC ralhrang in an ralbawi Major General mi 4, Brigadier General mi 14 le Colonel mi 44, an zaten 62 cu July 30 ah an sinak ihsin an colhter thu ralhrang zung ihsin theih a si.

An sinak le an hnatuan ihsin an colhter mi pawl hi vuanci zuang ih sinak nei pawl le a hlan cozah ih hlutdaw palai rak tuan pawl khal an tel. An colhter mi pawl hi army reserve force (A-yan-အရန်) hnaṭuan le sinak nei lo in an um.

DVB cun ralhrang in vuanci zung lam ih a ṭhawn an duh lo ruangah civil lam ih um khal an um. A hrek cu army reserve force (A-yan-အရန်) an thlen hnuah sinak nei lo ih cawl lanta khal an um thu ralhrang zung ih sinak nei pakhat in a sim thu a tarlang.

Ralkap ahcun Major General, Brigadier General le Colonel an thlen hnuah bikhiah mi can ih an sinak kai lo pawl cu army reserve force (A-yan-အရန်) an kuat ṭheu tiah ralkap cawl zo pakhat cun a sim.

Army reserve force (A-yan-အရန်) ih kuat mi pawl cu an vanṭha ih hnaṭuan an nei asile ralkap in an ko sal. Army reserve force (A-yan-အရန်) timi cu hnaṭuan nei lo pawl an si.

Ralhrang in thuneihnak an lak hlan 2020 ah Lieutenant General Tun Tun Naung, Lieutenant General Min Naung, Lieutenant General Tin Maung Win, Lieutenant General Than Tun Oo le Lieutenant General Lu Aye khal Army reserve force (A-yan-အရန်) ah an rak kuat dah zo.

A tu ah Lieutenant General Lu Aye (Chief of Defense Staff (Army), Lieutenant General Than Tun Oo (Chairman of the Nay Pyi Taw Council), Lieutenant General Min Naung (Ministry of Agriculture, Livestock and Irrigation), Lieutenant General Tun Tun Naung (Minister of Border Affairs) tin sinak le ṭuanvo an pek sal.

SAC ralhrang in an ralbawi pawl cu Lieutenant General sinak nei pawl tiang an sinak le ṭuanvo an thleng vivo ruangah lehhnu khalih an colhter ding mi a um tiah ralhrang thawn a pehpar mi hnen ihsin an theih thu DVB cun a tarlang.