Myanmar Ralhrang In In Pehtlaih Ruangah Raltlan Dawikir Tumnak A Um Lo Tin Mizoram Home Minister In Sim

Myanmar Ralhrang In In Pehtlaih Ruangah Raltlan Dawikir Tumnak A Um Lo Tin Mizoram Home Minister In Sim

Mizoram ih Myanmar raltlan thu thawn pehpar in ralhrang in Mizoram cozah a pehtlaih ruangah raltlan pawl dawrkir sal tumnak a um lo. Mizoram cozah le Myanmar ralhrang a thupten pehtlaihawknak khal a um lo tiah Mizoram Home Minister Pu Lalchamliana in a sim.

Myanmar ralhrang ramleng vuanci Wunna Maung Lwin hminkhen mi ah Mizoram ih raltlan pawl cu kuat tlung sal ding thu thawn pehpar in ralhrang hotu hnenih ca thlen mi August 5 ih a darh ruangah raltlan pawl an thin a nuam lo tiah theih a si.

Kolkata ih Myanmar ralhrang palai zung ihsin ca kan dong, June 23 ih in kuat mi a si. A thupten pehtlaihawknak si lo in raltlan pawl kan hmuh dan in sut ih kannih khal in ca ka let zo tiah a sim.

“Kannih cun raltlan pawl hi tlung sal sehla kilhimnak an pe thei ding maw? Ziangtivek in nan zoh ding ti pawl kan sut bet sal. Tuni tiangah ziang thu hman in sim sal nawn lo. A thupten raltlan pawl parah laireltu kan si lo. Ca in kuat ruangah kannih khalin Mizoram cozah le raltlan karlak ah hmuh thiam lonak um lo dingin raltlan pawl parih an lungput kan sut sal mi a si. Hivek ruangah raltlan pawl dawi tlung ding tivek kan ruahnak khalah a um lo” tiah Mizoram Home Minister Pu Lalchamliana in a sim.

Myanmar raltlan pawl ih ca kuat mi cu Mizoram cozah in July 14 ah raltlan pawl parih an lungput sut bet salnak an kuat zo. A tufang Mizoram ramkulh sungah Myanmar raltlan 40,000 hrawng an um tiah theih a si.