Yinmabin Le Pale Peng Ah Ralhrang Pawl In Khua An Ur Ih Ruak 8 An Sar

Yinmabin Le Pale Peng Ah Ralhrang Pawl In Khua An Ur Ih Ruak 8 An Sar

Ralhrang pawl in August 14 zing ah Yinmabin (ယင်းမာပင်) peng le Pale peng ih ဇီးဖြူကုန်း၊ ရွာနောင်၊ မုံသွင်၊ ဇီးရင်း, ရင်ပေါင်တိုင် khua pawl cu raldonak helicopter in an kap ih khawsung mi pawl inn an ur tiah theih a si.

“Zing nazi 7 hrawng ah ရင်ပေါင်တိုင် khua ih inn an ur hmaisa bik, ဇီးဖြူကုန်း khua khalah an ur. Nazi 10 hrawngah helicopter a thleng ih ရင်ပေါင်တိုင် khua le a kiangkap pawl an kap. Helicopter khalin ralhrang an ret bet” tiah tualsung mi pakhat in Mizzima hnenah a sim.

ရင်ပေါင်တိုင် khua le Pale peng ih ရွာနောင် khua cu helicopter in minute 30 hrawng an kap. Ralhrang pawl khawsung an lut ih aiawh in tualsung mipi khal an kai. Tualsung mi le mipi kilhimtu hrekkhat hriam an tuar ih an kaih mi khal an um. Ralhrang pawl an tlan hnuah khawsung ah kan lut ih an thah mi ruak kan hmu tiah ရင်ပေါင်တိုင် khawsung mi pakhat in a sim thu RFA in a tarlang.

“Helicopter an hman mi cu Mi 35 le Mi 17 a si. Khaw dang khalah an kaih mi a um. Hriamtuar pawl khal an hruai thotho. An ur that mi khal a um ih nunau ruak pakhat a tel, mi 10 hnakih tam an kai. Ralhrang lam khal mi 30 hnakih tam an thi ding” tiah tualsung mi pakhat in a sim.

Inn 1,000 hrawng umnak ရင်ပေါင်တိုင် khua, Yinmabin le Pale peng ranri ပုထိုးသာ၊ ရွာသစ်၊ ညောင်တန်း၊ အေးကုန်း၊ ကျေးစကျ၊ ဇီးရင်း khua ih tualsung mi tam zet ral an tlan tiah theih a si.

“Ralhrang mi 200 an si ding na sa zetin kan kapaw. Mipi kilhimtu ruak 2 kan hmu sal, a dang mi 2 cu nungdam ten an rak um ih kan run suak thei. An pahnih lakah pakhat cu a dinhmun a tha lo zet” tiah ချင်းတွင်းရိုးမ မဟာမိတ်တပ်ပေါင်းစု ih tuanvo neitu in a sim thu Mizzima in a tarlang.

August 11 khalah Yinmabin peng ih nitlaknak lam khua pawl cu helicopter in an kap. ရင်ပေါင်တိုင် khua ah inn 20 hrawng an ur kang. Caw, naa le tilva pawl an that, innsung thilri hrekkhat khal ralhrang pawl in an la tiah tualsung mi pawl ih sim mi ihsin theih a si.