Yangon Thingangyun Ih Mi Lutsuak Cekfelnak Zung An Kap Ih Mi 1 A Thi, Zung Hotu Hriam A Tuar

Yangon Thingangyun Ih Mi Lutsuak Cekfelnak Zung An Kap Ih Mi 1 A Thi, Zung Hotu Hriam A Tuar

Yangon khawsung Thingangyun peng ih mi lutsuak cekfelnak (Immigration-လ.ဝ.က) cu August 12 simlam nazi 3 hrawngah mi pahnih in meithal in an kap, Deputy Chief of Staff a thi ih Chief of Staff hriam a tuar tiah theih a si.

Thingangyun peng (သင်္ဃန်းကျွန်းမြို့နယ်) ih mi lutsuak ceknak zung hi an hmin se zet. Hmatpungtin tuah pawl paisa an dil theu ih an hmin a thang na sa” tiah tualsung mi pakhat in Myanmar Now hnenah a sim

BBC cun Chief of Staff zung sungah mi 2 an lut ih an kap. Hnatuan pawl zohman cangvai lo dingin an sim. Deputy Chief of Staff in hnatuan pawl an kah a phan ruangah a nam hai ih tlun lam ah vei 2 meithal a puak. Cui hnuah vei 2 an kap sal ih a awm a ngah, a lung an ngah si ding sizung an thlen hlan ah a thi tin kiangkap tualsung mi pawl ih an sim thu a tarlang.

Chief of Staff (ဦးစီးမှူး) U Win Naing Htwe hi a awm ah an kap ngah ih sizung ah a um, a dinhmun a tha lo zet. Deputy Chief (ဒုဦးစီးမှူး) U Kyaw Moe cu a awm ah vei 2 an kap ngah ih a thi tiah DVB ih tarlang mi ihsin theih a si.

Thil thlennak Thingangyun peng, လေးထောင့်ကန် veng, U Bahan lamzin, BOC station kiangkap le zung sung ah ralhrang pawl in bu an khuar cih ih lamzin mi vak pawl khal an cek tiah tualsung mi pawl in an sim.

Insein peng Danyigon veng khalah August 12 zing ah အရန်မီးသတ်တပ်ခွဲမှူး ကိုလှိုင်မင်းထွန်း (Kum 37 hrawng) an ti mi cu bike pakhat ih mi 3 to in an kap ih a thi tiah theih a si.

August 11 ah Shwe Pytha veng hmun 2 bomb a puak. Zan nazi 7 hrawngah Veng (7) nak ih veng lal zung le nazi 7:30 hrangah veng (10)nak ih veng lal zung ah bomb a puak. Bomb puak ruangah veng lal mi 2 telin mi 4 in hriam an tuar tiah Myanmar Now in a tarlang.

Bomb puahnak veng lal pahnih cu ralhrang kut tang ihsin an hnatuan bang dingin Yangon a thupthiar ih mi dotu YUGA in ralrin an peknak a si thu an tarlang.

Ralhrang pawl in ramkhel mi 4 an khai that hnuah mipi kilhimtu pawl cun Yangon khawsung ah na sa sinsin in an cangvai. Ralhrang pawl khalin Yangon khawsung kilhimnak hngetkhoh zetin an fehpi nan khawpi sung hmun dangdang ah bomb puak le ralhrang lam tang pawl thianfainak theih ding a tam sinsin.