Zarh 1 Sungah Tayakung Khua Ah Boruak A Dai Thei Hrih Lo

Zarh 1 Sungah Tayakung Khua Ah Boruak A Dai Thei Hrih Lo

Kalaymyo thlanglam Tayakung khaw kiangih mipi kilhimtu le ralhrang pawl kahawknak zarh 1 sungah boruak a dai thei hrih lo ih August 8 khalah kahawknak a suak thu theih a si.

Mipi kilhimtu tangtlang le ralhrang pawl August 2 ihsin an kapaw. Thi le hriamtuar tam ralhrang pawl cu Tayakung khawsung ah an lut ih bu an khuar. Ralhrang pawl in khawsung inn 50 le fang inn 2 an ur kang tiah tualsung mi pawl in an sim.

“Ralhrang pawl in khawsung ah ttum 3 inn an ur ih a zaten fang inn 2 telin inn 52 an ur kang. Khawsung mi pawl an tlan thluh, thilri la suak man an um lo. Simlam ah boruak a dai ding ih tlun sal theih kan zum nan zarh 1 sungah khua a tlun theih hrih lo” tiah tualsung mi pakhat in a sim.

Kahawknak ruangah Tayakung khaw kiangkap khaw 5, Taukkyan (ထောက်ကြန့်), အရှေ့ စံသာ, အနောက်စံသာ, Cia-in khua telin in tualsung mi pawl sahimnak hawl in khua an suah san. Raltlan pawl cu sungkhat hnen, kawhhran zawng khalin a remcan dandan in kiangkap khua le Kalaymyo khawsung ah an beu tiah theih a si.

“Ralhrang pawl in Tayakung khaw mi kum 54 hrawng cu a inn hmai rori ah an kap that. အနောက်စံသာ khaw mi ke tha lo mipa pakhat khal Tayakung khua thlen hlan ah an kap that bet. Taukkyan khaw mi pakhat le Thuma khaw mi lo hnatuan veve telin Tayakung khawsung mi thawn an zaten 58 ralhrang pawl in an kai ih ni 2 hnuah an zaten an suah sal. An kaih mi lakah nau nei zikte a telih an suah hnu an beunak ding phungki tlawng an thlen ih rei lo te ah fanute a nei” tiah tualsung mi pakhat in a sim.

Ralhrang pawl hi lamzinpi zawh duh lo in GTC tlawnginn ihsin lolak in an feh. Tayakung ihsin falong 2 hrawng, lolak ah mipi ralkap pawl thawn na sa zetin an kapaw. Ralhrang pawl khal hmainor thei lo, dungsip ngaingai thei lo in an tang ih mipi kilhimtu pawl dung an sip hnuah khawsung ah an lut ih bu an khuar tiah theih a si.

Tayakung khua hi Kalaymo thlanglam, Kalay in peng 7 hrawng ih hla, inn 348 hrawng umnak khua a si.