Sagaing Ramthen Zarh 1 Sungah Ralhrang Pawl In Inn 500 Hrawng An Ur Kangih Tualsung Mi 500 Luan Sahimnak Hawl In An Tlan

Sagaing Ramthen Zarh 1 Sungah Ralhrang Pawl In Inn 500 Hrawng An Ur Kangih Tualsung Mi 500 Luan Sahimnak Hawl In An Tlan

Sagaing ramthen ah ralhrang pawl in lei lam le tlunvan lam in operation an tuah ih August zarh 1 sungah khaw 10 hnakih mal lo, inn 500 hrawng an ur kang, tualsung mi 5,000 hnakih tam sahimnak hawl in an tlan tiah theih a si.

ဒီပဲယင်း peng ah ကိုင်းကံ၊ လျှော်ဖြူ၊ ဘုရားထွက်၊ အင်ပင်-ယဒင်၊ နဂါးဘို၊ မကျည်းအုပ်၊ အင်းတန်း, အရာတော် peng ah ကောင်းသစ်၊ မင်းရွာကြီး၊ ဟင်္သာရွာ၊ အုပ်ရှင်းကြီး၊ ရှောက်ခါး၊ ဘောင်ကျ၊ အောင်သာ, Kalay peng ah Tayakung le Yazachu khua telin khawsung mi ral an tlan. A tufang ah ei in an harsa tiah raltlan bawmtu pawl in an sim.

August 1 ah မြင်းမူ peng လက်ပံကျင်း khua cu ralhrang tam zet in helicopter in an kap ih inn 15 a kang. August 4 ihsin ni 6 tiang ralhrang zan riak pawl in အရာတော် peng မင်းရွာကြီး khalah inn 250 hrawng an ur kang ih a tlan suak thei lo, kum 80 mi hrawng ဒေါ်ရှင် a kang that. ဒီပဲယင်း peng khalah ကိုင်းကံ khua, August 6 ah inn 180 hrawng a kang ih ကိုင်းကံ khua tikawng kiangah nunau pakhat telin ruak 4 an hmu, ziang khua an si ti nemhnget theih a si lo tiah tualsung mi pawl in an sim thu RFA in a tarlang.

အရာတော် peng ih မင်းရွာကြီး khua ah ဘုရားထွက် ihsin feh ralhrang pawl in ralthuam tum an kap ih inn an ur thu မင်းရွာကြီး khawsung mi pakhat in a sim.

August 7 ah bomb an kam mi pawl le inn an ur kang mi cu mipi kilhimtu pawl in an thianfai. Inn kang tuartu pawl cu phungki tlawng ah an ret tiah RFA in a tarlang.

Khawsung an lut tinten thahrum hmang in inn an ur ruangah dothlengnak a cak sinsin. Ralhrang huatnak a luar tiah inn an ur kang sak mi pakhat in a sim.

“Ralhrang pawl cangvaih dan cu milai lungput khal nei lo an si. Mipi nekrawknak cu anmah huatnak tamtertu a si ih an do sinsin ding. Inn khal an nei lo, thahrum hmannak ruangah anmah an do deuhdeuh ding. Helicopter thawn mi an kap cu mi burpi thahnak a si” tiah ဒီပဲယင်း mipi kilhimtu sungtel pakhat in a sim thu RFA in a tarlang.

ဒီပဲယင်း peng sungih ralhrang mi 100 hrawng operation tuah ဖောင်းပြင် hrambun khah-lah-yah (367) battalion cu August 7 ah အရာတော် peng sung an lut tiah tualsung mi pawl in an sim.

Data For Myanmar in June 7 ih a tarlang mi vek asile ralhrang pawl in thuneihnak an lak ihsin May 31 tiang Myanmar ram pumpi ah inn 18,886 an ur kang ih Sagaing ramthen sungah inn 13,830 an ur kang tiah a tarlang.