Yangon Ramthen Thunun Thei Dingin Ralhrang Pawl Kan Do Ding Tin Mipi Kilhimtu Pawl In Sim

Yangon Ramthen Thunun Thei Dingin Ralhrang Pawl Kan Do Ding Tin Mipi Kilhimtu Pawl In Sim

Yangon ramthen la thei dingin lamzin phun 3 in ralhrang pawl kan do ding tin Yangon ramthen mipi ralkap pawl in August 7 ah zoom in a vei 1 nak thuthang simfiangnak an tuah mi ah Yangon ramthen mipi ralkap thusim theinak tuanvo neitu in sim.

“Yangon ramthen thunun thei dingin kan zuam ding. Cu mi hrangah ralrel dan kan nei ih phun 3 in ralhrang pawl kan do ding. Pakhatnak ah Rosy Wave (နှင်းဆီလှိုင်း) in a thupthiar in an cangvai dingih ralhrang pawl umnak le thuthennak zung pawl ah bomb an puah ding. Pahnihnak in Eagle Wave (သိန်းငှက်လှိုင်း) cu Rosy Wave (နှင်းဆီလှိုင်း) hnakin an cangvaih dan a na deuh ding ih kahawknak khalah an tel ding. A neta bik Dragon Wave (နဂါးလှိုင်း) cun Yangon ramthen an lak thei tiang an do ding. Ramhrin miphun hriamhraikai pawl thawn tangtlang in Yangon ramthen an thunun thei tiangin ralhrang pawl an kap ding” tiah a sim.

Yangon ramthen mipi ralkap pawl in ramhrin miphun hriamhreikai (EAO) pawlkom 2 thawn pehtlaihawknak tha an nei. Cui EAO pahnih cu Myanmar ram sungih thazang a cak zet mi EAO ah an tel tiah theih a si.

A tufang ah Rosy Wave (နှင်းဆီလှိုင်း) pawl lawng an cangvai lai, a rei hlan ah Eagle Wave (သိန်းငှက်လှိုင်း) an cangvai cing ding tiah Yangon ramthen mipi ralkap ih theihternak tuanvo neitu in a sim.

Yangon ramthen mipi ralkap (ရန်ကုန်တိုင်း ပြည်သူ့တပ်မဟာ) hi 2022 April thla ah dothlengnak tuah pawlkom 16 burkhawm aw an si ih Justice Lady Mission timi in July 27 ihsin an mission an thok rero zo. Ralhrang lam tang le thuthennak zung pawl ah bomb puah rero tu an si thu khal a sim bet.