Zarh 1 Sungah Tio Ih Ralhrang Sakhan Zan 3 Drone In Bomb An Thlak

Zarh 1 Sungah Tio Ih Ralhrang Sakhan Zan 3 Drone In Bomb An Thlak

Myanmar le India ramri Falam peng Rihkhawdar ahmat (2) veng tlangpar ih ralhrang sakhan cu mipi kilhimtu pawl in zan 3 drone in bomb an thlak tiah theih a si.

August 2 ihsin ni 4 tiang zan tin ralhrang sakhan ah bomb an thlak ih August 6 zan nazi 12 ihsin zianglam nazi 5 tiang bomb vei 10 hnakih tam bomb puak on an theih thu tualsung mi pawl in an sim.

“Zan 3 zan var bomb puak kan thei. Ralhrang pawl ih meithal kap mi khal kan thei. August 6 zan khalah khawvang tiang bomb puak on theih ding a um. Cui zan cu ralhrang pawl meithal kap on kan thei lo. Ralhrang pawl an sakhan sungah an um paih nawn lo ih sakhan kiang inn ah an relh khal a si thei. Zing ahcun Tio tlangpar ih an sakhan ihsin Rih sakhan lam ah ralhrang 15 hrawng ke in an feh” tiah tualsung mi pakhat in a sim thu Zalen thuthang in a tarlang.

Tio tlangpar ah ralhrang pawl in sakhan an tuahnak a rei hrih lo. Cu tawk ihsin khat lam khat lam a hmuh thluh theih ih sakhan rem zet a si ruangah mipi kilhimtu pawl hrangah ngaithupi tlak a si tiah tualsung mi pakhat ih sim mi ihsin theih a si.