Yangon Ih Ramleng Feh Ding Chin Mi 27 An Kaih Mi An Suah Sal

Yangon Ih Ramleng Feh Ding Chin Mi 27 An Kaih Mi An Suah Sal

Yangon North Dagon (39) veng ih um Chin mi ramleng feh ding mi 27 an kaih mi cu August 1 ah an suah sal tiah tualsung mi pakhat in a sim.

July 31 simlam nazi 5 hrawngah ralhrang motor 3 le palik 40 hrawng in an va kai tiah theih a si.

“Inn pakhat ah minung um an tam deuh tla a si men ding. August 1 ah an zaten an suah thluh zo. Mindat peng mi khal an um, midang pawl khui tawk peng mi an si ti ka theifiang lo. Ramleng feh ding an si ih ramleng fehnak ding ca pawl khal an hmuh thluh thei” tiah tualsung mi pakhat in a sim.

A tufang Yangon khawsung ah ralhrang pawl in kilhimnak an uluk. Lamzinpi lawng si lo in vengsung pawl khalah ralhrang motor vak hmuh ding a um. Ramdang feh ding le Yangon ih cambang pawl mikhual cazin sim thei lo ih an theih sal asile buainak pakhat khat um thei a si.

Myanmar ram buai pekte lam ah North Dagon hi emmercy ih an rak phuan mi a si ih ralhrang thuneihnak dokalhtu pawl an kaih mi ralhrang thuthennak ih an thuhla rel sak mi khal an um.

July 24 simlam nazi 3:30 khalah North Dagon (30) veng, မြသီရိ (1) lamzin ih inn pakhat ralhrang pawl an luh hnawh ih an kap ruangah innsung ih um mi 2 an thi ih mi 2 an kai tiah theih a si.