Tahan Vengsung Ah Nazi 1 Hnakih Rei Kahawknak A Suak

Tahan Vengsung Ah Nazi 1 Hnakih Rei Kahawknak A Suak

Tahan vengsung le lamzinpi, July 14 simlam nazi 6 hrawngin meithal puak na sa zetin theih ding a um ih nazi 8:30 tiangah a reh ngaingai thei hrih lo tiah theih a si.

Khawthim hlan in meithal puak a tam ih ralthuam tum khal vei tam zet a puak. Tahan suakthuan tlawnginn ahmat -5 (A-thah-kah 5) dunglam, Tahan nemi 14 ah ralthuam tum a tla ih thi le hriamtuar an um lo tiah tualsung mi pawl in an sim.

“Inn pakhat an tikholhnak ah a tla, a khu luilo cu kan vun hmu. Thi le hriamtuar an um kan thei lo” tiah tualsung mi pakhat ih sim mi ihsin theih a si.

Ralthuam tum tlaknak ah rangva le thlalang kuai mi a um. Bomb a tla tam nan khui tawk veng pawl ah a tla ti theihfiang a si hrih lo. Zan nazi 9 tiangah khat tawk khat tawk in puak on theih ding a um thu khal tualsung mi pawl in an sim.

Kalay peng sungah ralhrang le mipi kilhimtu kahawknak a reh ngaingai thei lo. July 11 in 13 tiang Kalaymyo thlanglam khalah ralhrang le mipi kilhimtu na sa zetin an kapaw ih ralhrang mi 20 hnakih tam an thi. July 12 sun 1 luan hrawngah Kalaymyo khawsung, Sanmyo veng suakthuan tlawnginn (Ahmat 8) ih ralhrang um pawl cu mipi kilhimtu pawl in an va kap. Ralhrang thi le hriamtuar an um le um lo theihfiang a si lo tiah kiangkap tualsung mi pawl ih sim mi ihsin theih a si.