ICJ In Ralhrang Pawl Ih Cohlan Lo Mi July 22 Ah Thutluknak An Tuah Ding

ICJ In Ralhrang Pawl Ih Cohlan Lo Mi July 22 Ah Thutluknak An Tuah Ding

Gambia ram in Rohingya miphun thah cimit tumnak tin Myanmar ralhrang pawl taza a cuainak cu ralhrang palai in an cohlang lo ruangah thuthentu pawl in July 22 ah thutluknak an tuah ding thu ICJ thuthennak zung in July 11 ah an tarlang.

Netherlands ram The Hague khawpi ah Peace Palace tin an kawh mi ICJ thuthennak zung, July 22 tlawngkai ninga simlam nazi 3 ah thuthentu Joan Donoghue in thutluknak an tuah mi a siar ding.

Covid nat thawn bikhiah mi vekin hi ni ah khat lam khat lam palai, thuthentu, zung hnatuan, media hrekhat luh an sian mi pawl lawng an lut thei ding. A leng lam ihsin a ngai ve duh pawl an lut thei lo ding ruangah palai (diplomats -သံတမန်) le mipi hrangah ICJ website in live an thlah ding.

Gambia ram ih tazacuainak cu ICJ in hliakhlai ih relsak thei mi a nei lo tin Feb 25, ah ralhrang palai pawl in an cohlang lo ih an dokalh tiah RFA in a tarlang.