Kalaymyo Ah Ralhrang Pawl In Tualsung Mi 1 An Kap Ngah

Kalaymyo Ah Ralhrang Pawl In Tualsung Mi 1 An Kap Ngah

Kalaymyo khawsung Taungphila veng, Naypyidaw fehnak lamzin tonawknak ah ralhrang pawl in July 7 zing ah mi an cek ih tualsung mi pakhat an kap ngah tiah theih a si.

“Zing nazi 10:30 hrawngah bomb puak vei 2 kan thei. Meithal khal a puak, tualsung mi 1 a kut le a dunglam zang ah ralhrang pawl in an kap ngah nan a thi lo. Amah hi nupi le fate 4 nei a si” tiah tualsung mi pakhat in a sim.

Hi hmun ah hin ralhrang pawl in tualsung mipi vak sukso an cek theu. Kalay PDF cun ralhrang mi 50 hrawng bomb an rak puah thu, bomb an puah mi ah ralhrang mi 2 an thi ih ralhrang sinak sang pakhat tel in mi 6 in hriam an tuar thu, ralhrang pawl in tualsung mi pakhat an khaih thu mizan ah an tarlang.

Kalaymyo ah ralhrang pawl in mi an cek tikah tualsung mi tam zet an kai theu. Bike toolbook lawng zoh lo in mi an kaih tengteng theinak dingah cu mi na keng maw, kha mi na nei maw tin mi an sut ciamco. License si maw, an suh mi pakhat khat ken lo cun mi an kai tengteng. Cu vek thotho in motor mawng pawl khal a cipciar in thu mi an sut theu tiah motor mawng pakhat in a sim.